Medra l'asturianu na rede

12506 articulos na Uiquipedia, dellos diarios dixitales dafechamente n’asturianu y dende va unos meses el portal Asturbulla tien una estaya n’asturianu.
Si esto nun fora pocu, l’interes de los llectores pol asturianu fai que los diarios dixitales vayan medrando nel ranking Alexa. Nel casu d’Aruelu.com medramos nun 600% nel númberu de visites, la edicción dixital de Les Noticies un 450% y Infoasturies nun 370% como los más destacaos.

Asturies.com busquen redautores/collaboradores pal so proyeutu informativu, n’Asturbulla fain un llamáu al traviés del filósofu y escritor Carlos X.Blanco, collaborador d’esti portal de noticies, a los blogueros y escritores n’asturianu pa qu’amesten contenios. Aruelu.com vien de sumar dos nuevos collaboradores nos caberos meses, aumentando con ello correlativamente’l númberu de visites diaries.
Tantu Asturies.com, como Infoasturies y Aruelu cunten con un canal blogues onde los blogueros n’asturianu tienen un espacíu pa promocionar los sos contenios.
Los portales Asturnews y Aruelu trabayen con llicencies Copyleft y Creative Commons respectivamente, lo que fai que los sos contenios puean ser espublizaos n’otros foros, mentando la fonte.

A too esto hai de sumar la estaya d’asturianu de l’axencia de noticies Europa Press con contenios diarios n’asturianu, el portal d’información alternativa Glayiu.org o la web de noticies de la comarca d’Avilés, Gauzonia.info, aparte de los munchos blogues que conformen la blogosfera n’asturianu.

Amás son munchos los coleutivos sociales, medioambientales y culturales que fain la so páxina tamién n’asturianu, como por exemplu Espeleoastur o Softastur qu’ufierta un sistema operativu llibre dafechamente n’asturianu, nomáu Ubuntu. Tamién esiste un archivu de videos n’asturianu, nomáu Yetube.
En definitiva, l’asturianu tien una bayura de medios dixitales y lo qu’entá ye meyor la so aceutación va medrando.

Fonte: Aruelu.com