14/4/16

Un activista de 80 años anuncia una fuelga de fame pola falta d'una política llingüística y cultural en Breizh


Un activista de 80 años anuncia una fuelga de fame pola falta d'una política llingüística y cultural en Breizh
Yannig Baron tenía previsto aniciar una fuelga de fame esti domingu por mor de la falta de diálogu de les autoridaes bretones y d'una política llingüística y cultural en Breizh. Tres recibir un corréu del vicepresidente del Conseil régional de Bretagne, decidió posponela pa la primer selmana de mayu.
El pasáu 14 de marzu miembros de la iniciativaBreizh-ImPacte aconceyaron con responsables del conseyu rexonal qu'alministra la mayor parte del Breizh históricu cola fin aldericar sobre la necesidá d'una política cultural y llingüística nueva nel territoriu. La respuesta de l'Alministración foron bones pallabres y reuniones nueves pa enantes del branu, un plazu que pa esti coleutivu resulta inadmitible al considerar "que la situación en Breizh nun pue esperar selmanes y meses".
Breizh-ImPacte entiende que'l Conseil régional de Bretagne "nun tien visión, perspeutiva nin proyeutu pa la llingua y cultura en Breizh" y que les midíes tomaes hasta la fecha "son d'escasa relevancia". Énte esta situación, Baron, una personalidá cultural y política bretona nacida nel 1936, amenazó con entamar una fuelga de fame nel Eñvoradur Santez Anna Wened, con aniciu previstu pal domingu.
Finalmente, una comunicación vía corréu lletrónicu de Jean-Michel Le Boulanger, vicepresidente del Conseil régional de Bretagne y encargáu de Cultura, llevó a Baron a posponer dicha fuelga hasta la primer selmana de mayu pol compromisu del políticu d'afondar nesti tema a lo llargo d'esti mes.                                               Fonte: Asturies.com

2 comentarios:

  1. Ties bien bona voluntá, pero vas morrer de fame a la to edá Yannig Baron, eso ye pa los xóvenes si ye que préstanse pa ello que es ye otra, home.

    ResponderEliminar
  2. La xente mozo nun ta p'ayunos nin fuelgues de fame, anque sí pa celebrar bonos y llargos botellones y meyores meriendes.

    ResponderEliminar

Los comentarios tán pendientes de moderación. Espublizaránse lo primero dable.