Tres prestosos actos culturales, nuna tarde

 Vicente García Oliva ye académicu de númberu de l'ALLA
    Esti Xixón ta que lo quema, siempres atarraquitáu d’actos culturales y munchos d’ellos de baldre. Asina, ayer pude tar en tres d’ellos ensin salir del mesmu recintu: el “mio” antiguu Institutu Xovellanos qu’entovía recuerdo colos sos profesores y los collacios qu’ellí estudiamos, dellos de los cuales siguen siendo amigos.

    El primeru de los actos fue la presentación del llibru gráficu d’Alfonso Zapico, La balada del Norte. El salón d’actos del Institutu taba enllenu pa sentir falar al Premiu Nacional de Comic, Zapico, con un títulu anterior -Dublinés- de gran impactu y nun sólo n’España. Ente’l públicu afayábense munches cares de socialistes conocíos, incluyíu l’últimu portavoz municipal señor Argüelles, o la que per un tiempu fue Defensora del Pueblu Asturianu (o como se llamare aquel inventu frustráu) María Antonia Fernández Felgueroso, hermana de doña Paz l’alcaldesa que tamién taba. L’ambiente yera mui festivu, yo diría que demasiao pa presentar dalgo tan serio como los antecedentes de la famosa “Revolución del 34″. La xente falaba dende abaxo colos de la mesa, o ente sí. Los propios participantes de la mesa interactuaben unos con otros, xuxuriando en voz baxa y la impresión -la mía- yera qu’había demasiáu baturiciu y poca atención. Pa más aquello, un de los presentadores, el que facía’l diálogu col autor, caltúvose tol actu cola gorra atornillada (yo sigo calteniendo eses coses burgueses de la educación) y el propiu Zapico tuvo tol actu mirando pa la mesa, mientres firmaba exemplares de xente que xubía y baxaba al estráu p’apurri-ylos. Paez que l’autor tenía pocu tiempu y nun quería que llueu se formaren grandes coles. En fin, pese a toa esa escenografía, a mi gustóme lo que dixo Alfonso, que paez que tien les idées mui clares sobro lo que quier facer, y como él ye un gran dibuxante, de xuro que podremos esfrutar de dos interesantes tomos -el primeru los preparativos, y el segundu la propia historia del llevantamientu- al rodiu d’un fechu que marcó a varies xeneraciones d’asturianos. Paez que los 7.000 exemplares del primer tomu yá tán cuasi vendíos, lo qu’amuesa l’interés que’l llibru espertó, n’Asturies y fuera d’ella.

    Nel patiu central del Institutu espurríase la esposición: La bici en Xixón. Del velocípedo al carril bici (I). Un mui interesante percorríu pola historia de la bicicleta y la so importancia na nuesa ciudá. Yo recuerdo de cuando yera guah.e, los centenares de trabayadores, como una verdader lexón, que diben a trabayar en bici. La zona del Natahoyo, La Calzada, Xove y El Musel, enllenábase de “velocípedos” de los currantes que, na parte d’atrás y amarrada con unes gomes, llevaben la cesta o la fiambrera cola comida pal día. Na esposición hai unos cuantos modelos de les antigües bicicletes y cómo fueron evolucionando. Munchos cartelos y anuncios de la época, y unes cuantes semeyes mui guapes, la mayoría  de Constantino Suárez, de carreres o otros eventos rellacionaos. Yo eché de menos dalgunes bicicletes más (paeciéronme escases les espuestes) y que nun se punxere los nomes de los qu’apaecen nes semeyes, a nun ser cuando correspuenden a la familia de los de la Cuesta, fabricantes y conservadores de la tradición. En tou casu, repito, merez la pena dar una revolada perellí.

    Y na Sala d’Esposiciones de la entrada, esponíase una amuesa de les ilustraciones del asturianu Pablo Amargo. Pablo ye un reconocíu autor qu’algamó’l Premiu Nacional d’Ilustración y que tien una llarga llista de premios nacionales ya internacionales: El CJ Picture Book Award en Corea; dos Silver Medal en la Society of Newspaper Designer’s Awards EEUU; el Gold European Design Award en Helsinki y tamién el mui importante Premiu del Bancu del Llibru de Venezuela, ente otros munchos. Pero lo que más contentu me punxo de too fue que’l cartel anunciador de la esposición, que ta llantáu fuera, recueye la ilustración que Pablo Amargo fizo pal mio llibru El cielo de los dinosaurios, que me publicó la editorial Pearson en 2011. Una ilustración guapísima, como podéis confirmar ellí los que nun conozáis el llibru. Nun pude resistime a la tentación de faceme una semeya xunto a ella. Pero tolo qu’hai dientro de la sala, impresiona pola orixinalidá y la imaxinación de Pablo con unos cuadros que siempres te dan que pensar. Norabona a Pablo Amargo, y toi encantáu de poder tener participao como protagonista d’una de les sos meyores obres. Y equí acabo esti pequeñu rollu d’una tarde perbién aprovechada, y ye qu’esti Xixón da pa muncho.                                                            Fonte: TrabayuDeCampu.Vicente Garcia Oliva