Música, tradición y gastronomía xúnense en Mieres pa celebrar la primavera

Cartelu Folixa na Primavera 2015

   Mieres celebra la llegada de la primavera con trés xornaes de fiesta nel que s’amiesten música, tradición y gastronomía. 5.000 llitros de sidra tán preparaos pa repartir ente los asistentes, que van poder disfrutar de los conciertos de Skanda, Calum Stewart & Heikki Bourgault, Borja Baragaño y Moxie.

  El grupu mierense ta acabante d’algamar la so mayoría d’edá, que celebró cola espublización del llibru-CD-DVD ‘18’, y va ufrir una actuación especial nel Parque Xovellanos –epicentru de la Folixa– magar les 23 hores nel que va contar coles collaboraciones de Dani Álvarez, Alfredo González, Anabel Santiago, la Banda Gaites Villa de Mieres, la Big Band Mieres, Berto Argayaes, el Coru Mineru de Turón, Imanol Núñez, Juan Yagüe, Marisa Valle Roso, les Panderetes de Fitoria y Silvia Quesada. Pa zarrar esta primer xornada, el dúu formáu pol escocés Calum Stewart y el bretón Heikki Bourgault, que’l programa anuncia en formatu tríu pa esta nueche (00.30 hores), va dar el so primer conciertu n’Asturies.

  El músicu asturianu afincáu n’Alemaña, Borja Baragaño, va encargase d’abrir la cita musical de mañana a les 23 hores, momentu nel que, según les previsiones meteorolóxiques, la lluvia podría dar una tregua. El mierense, qu’ufrió delles actuaciones esti mes n’Asturies, va zarrar esta pequeña xira pel país con una actuación mui emotiva nel escenariu del Parque Xovellanos. Darréu, a les 00.30 hores, va ser el turnu pa Moxie, banda moza que fusiona la música tradicional irlandesa con soníos más contemporáneos. La Danza d’Oñón, a les 2.15 hores, pondrá puntu y final a la segunda xornada de la Folixa na Primavera.

La Sociedá Humanitarios de Samartín lleva’l Fini Suárez       La Folixa na Primavera va dar comienzo a les 19 hores d’esta tarde col chupinazu qu’anuncia l’espiche de les pipes de sidra, bébora que se va poder prebar mercando’l vasu oficial de la fiesta, que tien un costu de 2,5 euros. La organización pon 5.000 llitros pa repartir de baldre ente los trés díes. Los televisivos Toño (Alberto Rodríguez) y Petiso (Pedro Durán) van encargase d’animar estos momentos que van preceder a la entrega XV Distintivu a la Investigación Folclórica Fini Suárez, que nesta ocasión lleva la Sociedá Humanitarios de Samartín “pol llargu trabayu na conservación, espardimientu y dignificación de la cultura asturiana en toles sos estayes”.

  La presentedora del magazine de TPA ‘De hoy no pasa’, Arantxa Nieto, va lleer el pregón de la Folixa a les 20 hores, a lo que va siguir el festiva de tonada. Nesta ocasión van actuar José Antonio ‘Cantu la Vara’, Liliana Castañón, Patricia Pariente y José Manuel García, que van tar acompañaos a la gaita por Jesús Noriega y Belén Arboleya. Tamién ta prevista la presencia del Ochote Asturies, dirixíu por Luis Ángel Fombella. A les 21.05 hores el turnu va ser pa la Banda Gaites Villa de Mieres y pa los cantares de chigre en dellos establecimientos de la ciudá.

  El VI Tornéu Nacional Ximnasia Rítmica Valle de Turón, con sede en Figareo, va abrir l’actividá de mañana a les 9 hores, anque la fiesta nel Parque Xovellanos va prinicipiar a les 11 hores cola venta de la bolla. Tres una actuación del Grupu de Baiḷḷe Ruxidera, al meudía va procedese al repartu de sidra de baldre, preba que va tar animada dende les 13.30 hores por una actuación de la Banda de Música Mieres del Camín. Yá de tarde, magar les 17 hores, va haber xuegos pa neños y actuaciones de los grupos folclóricos Ruxidera, L’Artusu y El Cimborrio, éstos últimos de San Lorenzo del Escorial, a partir de les 18 hores peles cais de Mieres. Tres l’espiche de les pipes, a les 18.30 hores, va procedese a una amuesa de bandes de gaites cola participación de la gallega Ortigueira y les asturianes Avante Cuideiru, Marino Tapia, La Madreña (Llanera) y El Guminal (Ayer). Tanto estes agrupaciones como los grupos de bailles van percorrer dellos puntos de Mieres hasta l’entamu de los conciertos nocherniegos.

  El domingu, xornada cabera, el Grupo Folclórico Prau Llerón va actuar a les 11.30 y 13.30 hores nel Parque Xovellanos, espaciu que va tar destináu tamién pa los deportes tradicionales de la mano de Seis Conceyos (13 hores). La preba de sidre, como ye vezu, principia al meudía.

Menú gastronómicu     Mientres los trés díes de la Folixa na Primavera, dellos restoranes de Mieres van ufrir el menú tradicional compuestu por sopa d'ablanes o menestra del tiempu, bacaláu o cabritu y borrachines o sorbete de sidra. Otres actividaes paraleles son una amuesa de graffiti frente a la estación d’autobuses y una esposición bibliográfica sobre traxes y deportes asturianos na Biblioteca Pública que se va poder visitar hasta’l 15 de mayu.                                             Fonte: asturies.com

Adxuntu	Tamañu
Cartelu conciertu de Skanda na Folixa na Primavera 2015.jpg	114.25 KB