Iván Rendo y Águeda Díaz Tuero ganen el concursu 'Cola poesía na llingua' d'Iniciativa pol Asturianu

   Los ganadores del concursu al traviés del Twitter 'Cola poesía na llingua' foron Iván Rendo y Águeda Díaz Tuero. Iniciativa pol Asturianu entregó'l miércoles los gallardones en Xixón.

   El motivu d'esti concursu de micropoemes yera celebrar el Día Internacional de la Poesía utilizando la llingua asturiana y favorecer al empar la so difusión peles redes sociales. La organización que trabaya pola normalización del idioma dividió'l premiu en dos, ún por decisión popular y otru por un xuráu, resultando ganador del primeru Rendo col testu 'Dicen qu'hai más mundu qu'esto. Pero si abro los güeyos, el techu va siguir igual de blancu y tu tan llueñe como siempres' al ser el más retutieáu. La so recompensa foi un diploma, un llote de llibros n'asturianu, revistes de Formientu y un paragües d'Iniciativa pol Asturianu col lema 'Nun te mueyes col agual, muéyate col asturianu'. Tamién recibieron un diploma, un llibru y una revista de Formientu los diez siguientes más votaos, nesti orde: Berto Cla, Ernesto Is, María L., Xuan Miyar, Laura García Calvo, Nacho Wings, Isaz Rodríguez, Mino García Cuesta, Claudia Elena Menéndez Fernández y Paula.

   Mentes, el xuráu conformáu  por Lluis Portal, Enrique Carballeira, Iván Llera y Inaciu Galán, como secretariu en representanción d’Iniciativa pol Asturianu, decidió que'l merecedor del primer premiu fora Díaz Tuero con 'Suaño con date aliendu (y asina...) apuro lletres a deshora como a destiempu muérdote la boca'. La so recompensa foi un diploma, un llote de llibros, revistes de Formientu, el paragües y un añu d'inscripción como socia simpatizante d'Iniciativa pol Asturianu. El segundu premiu, conformáu por un diploma, un llote de llibros, revistes de Formientu y el paragües, foi pa Pablo Rodríguez Medina, y el terceru, valoráu nun diploma, un llote de llibros y revistes de Formientu, pa Miguel Rojo.

   La entrega de gallardones, celebrada ayeri nel salón d'actos del Conseyu de la Mocedá de Xixón, coincidió col eventu final de los VI Cursos d'Asturianu en Xixón qu'entamen el Conceyu Universitariu pol Asturianu y Iniciativa pol Asturianu, y nel que participaron más de mediu centenar de persones de manera presencial o a distancia.

Adxuntu	Tamañu
Acta del xuráu de 'Cola poesía na llingua'.pdf Fonte: asturies.com	388.74 KB