Asturies, capitalismu y globalización

- Manuel Vega Rodriguez (Xixón)

Murniu futuru espéra-y a Asturies si nun somos a camudar les coses.

Los partíos mayoritarios favorecieron un capitalismu y una globalización onde les rexones del mundu vense amenazaes pol procesu d'homoxenización cultural.

Esta llévase per delantre les llingües y les costumes yá que'l dineru y la plusvalía corrómpenlo too, y convierten a les persones, la natura, la cultura, el deporte, etcétera, nuna mercancía.

El mercáu crea mieos y sospeches, les multinacionales semen la miseria y solo'l dineru da la llibertá.

Los estrategues del poder invisibilicen y esquiven responsabilidaes ante l’aumentu del racismu, el fanatismu relixosu, les enfermedaes, les guerres, la esplotación, la destrucción del medioambiente, etcétera.

Los que creemos qu'otra Asturies ye posible y que solo dende la cooperación y la democracia participativa se pue construyir un mundu meyor debemos plantegar un procesu sociopolíticu y económicu cuyu oxetivu seya la xusticia social, la igualdá, la soberanía de los pueblos y la proteición del medioambiente.

Dientro de too esto, la reivindicación d’una nueva llei asturiana d’educación qu'abarque Primaria, Secundaria, FP y Universidá, asina como la oficialidá de la llingua, la reconociencia de nacionalidá histórica y la defensa de la cultura asturiana como un bien de toos y toes, tienen que ser drechos irrenunciables pa una Asturies con futuru.                                             Fonte: La Nueva España