La presentación de la web nueva de l'ALLA abre unes xornaes "indispensables pa tolos estudiosos de la llingua asturiana"

XXXIII Xornaes Internacionales d'Estudiu. Na semeya, Cano, Valdés, Suárez Rendueles, Melendi y Lastra nel momentu de la intervención musical, Uviéu

   Les XXXIII Xornaes Internacionales d’Estudiu abriéronse n’Uviéu cola presentación de la web nueva de l’ALLA, del númberu 111 de ‘Lletres Asturianes’ y del 4 de ‘Ciencies’. Esta iniciativa ye "una referencia indispensable pa tolos estudiosos de la llingua y la cultura asturiana”, afirmó María Paz Suárez Rendueles, vicerrectora d’Investigación y Campus d’Escelencia Internacional de la Universidá d'Uviéu.

   Suárez Rendueles foi la encargada de presidir la inauguración de les xornaes nun actu que contó cola intervención d’un gaiteru y la participación tamién de Cristina Valdés, decana de la Facultá de Filosofía y Lletres –onde se desendolca l’actividá–, y Ana María Cano, presidenta de l’Academia de la Llingua Asturiana (ALLA). Ente’l públicu tuvo presente Ana María Fueyo, direutora xeneral de Política Llingüística.

   La primera en tomar la pallabra foi Valdés, que destacó lo muncho que-y prestaba contar con esta actividá “nel centru de la universidá onde s’estudien les llingües, incluyía l’asturiana”, asina como la presencia “d’especialistes d’otros llugares” colos que “entrellezar redes”. Mentes, Cano agradeció l’asistencia y collaboración, “sobre manera a la xente que vien de fuera”, y declaró que “tolos que nos dedicamos a la llingua asturiana tamos satisfechos por unes xornaes yá perafitaes, que funcionen soles y que son cites añales pa munchos investigadores”. Darréu enumeró les ponencies, comunicaciones y presentaciones d’esti añu, nes que l’ALLA apostó por “una temática llibre”, y deseó que “sían granibles y contribuyan al estudiu de la nuesa llingua y la nuesa cultura, que nun son otra cosa qu’Asturies”.

.   Web con un diseñu modernu            El profesor del departamentu d’Informática de la Universidá d’Uviéuy académicu, David Melendi, encargóse de la ellaboración de la web nueva de l’ALLA y d’esplicar a los presentes les sos carauterístiques. “L’anterior tenía muncha información, pero ye verdá que’l diseñu yera un poco vieyu”, polo que la decisión a la hora d’anovar yera xestionar toda esa completa información nun diseñu más modernu. Pa ello apostóse pola ferramienta de software llibre WordPress, utilizada por dellos diarios de fama internacional. Según comentó Melendi, la mayor dificultá a la hora d’afrontar el proyeutu foi la organización de tola información, pa lo que s’utilizaron menús desplegables colos que l’usuariu pue facer la consulta que desee.

   Ente los apartaos nuevos de la web destaca la incorporación, na estaya ‘Coleiciones’ –dientro de ‘Publicaciones’– de la Biblioteca Llegáu Martín Sevilla, con tolos títulos que los herederos del profesor fináu nel 2013 donaron a l’ALLA. “Tán a disposición de toles persones que la quiera consultar”, señaló Cano, pa lo que namái han d’escoyer el títulu que necesiten y solicitalo a la institución académica.

   Darréu, la presidenta enumeró los artículos del númberu 111 de "Lletres Asturianes", boletín de l’ALLA, yá disponible en formatu papel y dixital. Nesta ocasión firmen na revista Xosé Lluis García Arias (‘Dellos anglicismos nel dominiu llingüísticu astur’), Xuan Xosé Sánchez Vicente (‘Delles notes sobre’l ‘Vocabulario asturiana y castellano, coleccionando de la viva voz del pueblo’’), Xuan Xosé Lajo (‘La estensión de los plurales -es/-en en Senabria’), Joaquín García de Quevedo (‘Vocabulariu de Villaḥormes, Llanes 1943’), Xulio Llaneza (‘Estudiu de la toponimia de Santa Bárbola, Samartín del Rei Aurelio. La hidrotoponimia’), Isabel Hevia y Xosé Antón González Riaño (‘Los xestores educativos énte’l valir social, cultural y educativu de la Llingua Asturiana. Un estudiu empíricu’), Moisés Selfa (‘Lengua y escuela: hacia un modelu de conjunción en la escuela asturiana’), Sergio Sánchez Collantes (‘Los juegos florales y el republicanismo en la Asturias de la Restauración’), Cristina García-Sampedro (‘Evolución histórica de la Parroquia de La Santa Cruz de Xove, Xixón’) y Damián Barreiro (‘La nación televisada: llingua y identidá nos programes n’asturianu de la Televisión del Principáu d’Asturies, TPA’). Amás, el llector va atopar les estayes habituales ‘Notes y anuncies’ y ‘Llibrería asturiana’.

.   Cinco artículos nel cartafueyu ‘Ciencies’          Carlos Lastra, direutor de "Ciencies. Cartafueyos de Ciencia y Teunoloxía", presentó pela so parte’l númberu 4 d’esta revista que tien como oxetivu esparder na sociedá asturiana los avances y investigaciones científiques y teunolóxiques con una perspeutiva divulgativa, emplegando pa ello la llingua asturiana. L’exemplar nuevu cuenta con 5 artículos, de los que dos fueron solicitaos a los investigadores pol propiu equipu de direición: ‘Mengua en dellos metros de los sistemes dunares costeros n’Asturies. ¿Nótase yá’l cambéu climáticu?’, a Ricardo Anadón, caderalgu d’Ecoloxía de la Universidá d’Uviéu yá xubiláu, y ‘La biodiversidá que llevamos con nós. Microbiota autóctono, probióticos y prebióticos’, a Juan Evaristo Suárez, caderalgu de Microbioloxía del departamentu de Bioloxía Funcional de la Universidá d’Uviéu.

   Protagoniza la portada d’esti númberu’l venticinco aniversariu de los protocolos web, acontecimientu que llevó a los profesores del departamentu d’Informática de la Universidá d’Uviéu David Melendi, Xabiel García Pañeda y Roberto García Fernández  escribir l’artículu ‘Evolución de los protocolos web nel so 25 aniversariu’. Les dos informaciones restantes lleven la firma del inxenieru I+D y investigador predoctoral de The University of Manchester Pablo García Chao (‘Aceros avanzaos d’alta resistencia’) y d’Ignaciu Llope (‘La nueche escura del ser: llocura y sociedá n’Asturies. Un repasu a l’asistencia psiquiátrica hasta la Guerra Civil, 1936-1939’), ésta última basada na conferencia que dio’l psiquiatra na Universidá Asturiana de Branu (UABRA).

   Tres les trés presentaciones, y enantes de dar pasu a la ponencia inaugural, protagonizada por Clarinda de Azevedo Maia, profesora de la Universidade de Coimbra, de nome ‘História da língua: elaboração e estamdardização. Alguns parâmetros para a análise destes processos nas Astúrias’, Suárez Rendueles agradeció a l’ALLA “el trabayu d’investigación qu’impulsa añu a añu” y refirióse a les Xornaes Internacionales d’Estudiu como una “referencia indispensable pa tolos estudiosos de la llingua y la cultural asturiana”. “La Universidá d’Uviéu siempre sofitará y desendolcará la difusión de la llingua asturiana tanto nel aspeutu docente como nel investigador”, añadió la vicerrectora d’Investigación y Campus d’Escelencia Internacional.

.   Programación de les xornaes         De tarde, les XXXIII Xornaes Internaciones d’Estudiu continuaron coles conferencies de Enrique del Teso, de la Universidá d’Uviéu, de nome ‘L’amestáu urbanu. Cuestiones de normativa y llingua escrita’, y d’Elena E. Rodríguez Díaz, de la Universidad de Huelva, con ‘El proceso de imposición de modelos lingüísticos en la Edad Moderna: el caso del patronímico Díez/Díaz en Sayambre’, pa depués entamar un alderique.

   Tres una posa, a les 18 hores tuvieron llugar les charres ‘El Regnum Asturorum y los reinos hispanos mencionados en L’Abreujamens de las historias (c. 1323) y el Compendium Historiarum (c. 1320) de Paolino de Venecia’, a cargu d’Alexander Ibarz, de la University of Reading, y ‘El neutro de materia na morfoloxía nominal del asturianu del conceyu de Ḷḷena’, por Rosabel San Segundo, de la Universidade de Lisboa. Darréu d’un alderique y una posa nueva, zarró esta primer xornada, a les 19.45 hores, la presentación por parte del Grupu AMPER-Astur, de la Universidá d’Uviéu, del ‘Atles de los modelos entonativos d’Asturies’.

   Cuatro comunicaciones van abrir la xornada de mañana, 16 hores, protagonizaes por Xosé Ramón Iglesias (‘Les primeres obres de Pepín de Pría’), Pablo Rodríguez Medina (‘Incidencia del mediu, condicionamientu y estratexes lliteraries en ‘El cuadernu de rayes’ de Miguel Allende’), Inaciu Galán (‘Adautación del enseñu d’asturianu al Marcu común européu de referencia pa llingües’) y Vicente García Oliva (‘Vides paraleles –que converxen nun puntu– de Don Xuan Junquera Huergo y Don Xosé Napoleón Acebal’). Tres l’habitual alderique y una posa, va desendolcase, a les 17.15 hores, la ponencia ‘‘Cuando examen les abeyes’: Primer testu lliterariu n’asturianu  y la so importancia na historia de la lliteratura’, de José Miguel Lamalfa, de la Universidá d’Uviéu, mentes qu’a les 18.30 hores el turnu va ser pa Ramiro González Delgado, de la Universidad de Extremadura, cola charra ‘Tradición clásica nel teatru en llingua asturiana’. Jesús Suárez López, del Muséu del Pueblu d’Asturies, va zarrar el día a les 19.30 hores cola presentación del ‘Atles Sonoru de la Llingua Asturiana’.

   Na xornada cabera, ocho comunicaciones van preceder a dos ponencies. Asina, a les 16 hores va tomar la pallabra Clara Elena Prieto con ‘¿Cómo ye, ho? Usos y valores de la interxeición ho nel asturianu actual’, pa depués continuar, con alderiques y posa cada cuatro intervenciones, Pablo Suárez García, con ‘L’arte la guerra. Sobre’l léxicu bélicu na nuesa llingua’; José Antonio Méndez Sanz, Adolfo García Martínez y José Ángel Gayol, con ‘Asturies incorporada: averamientu a les espresiones-mundu nel ámbitu asturianu’; Alberto Gómez Bautista, con ‘Algunas notas sobre la formación de palabras en mirandés’; Manuel de Abol-Brason, con ‘La nación de Asturias: realidad histórica frente a manipulación’; Xulio Llaneza, con ‘Llamar por teléfonu-Llamar pel teléfonu’; Xuan Xosé Lajo, con ‘Los posesivos en Senabria: variantes y sintaxis’; y Loreto Díaz Suárez, con ‘L’asturianu y les llingües de la Península Ibérica: taxonomía y denominación nos llibros de testu’. Por último, a les 18.45 hores, van intervenir Margarita Fernández Mier, de la Universidá de Lleón, y David González Álvarez, Universidad Complutense, cola conferencia ‘Una arqueoloxía pal paisaxe rural asturianu’, y, darréu, Coloma Lleal, de Universitat de Barcelona, con ‘Ideología lingüística y lexicografía’, que va servir de pieslle.          Fonte: asturies.com