Ángeles Carbajal lleva'l Premiu Xuan María Acebal de Poesía en llingua asturiana

Ángeles Carbajal. XX Premiu Xuan María Acebal de Poesía en Llingua Asturiana

   La ventena edición del Premiu Xuan María Acebal de Poesía n'asturianu recayó n'Ángeles Carbajal. El premiu, que concede la Conseyería de Cultura, ta dotáu con 3.000 euros.

   El xuráo encargáu de valorar les once obres presentaes tuvo presidíu pola directora xeneral de Política Llingüñistica, Ana Mª Fueyo Llaneza, ya integráu polos escritores Pablo Texón y Sofía F. Castañón y el filólogu Luis Casteleiro Oliveros.

   A esti galardón podíen presentase poemarios de tema, xénery y estructura llibres escritos en llingua asturiana con una estensión mínima de quinientos versos, siempres que fueren inéditos y non premiaos n'otros concursos.

   Ente les obres presentaes, el xuráo decidió por unanimidá conceder el premiu al poemariu tituláu "L'aire ente la rama" al destacar, según consta nel acta, "la voz personal y madura con que se va construyendo un poemariu harmónicu y de gran intensidá rítimica".

   La obra presentóse baxo'l seudónimu Entel. Abierta la plica, l'autora ganadora resultó ser Ángeles Carbajal.

   Ángeles Carbajal (Argüelles, Siero, 1959) ye llicenciada n'Hestoria del Arte pola Universidá d'Uviéu. Collaboradora de la revista Clarín y directora de talleres lliterarios entamaos pol Conceyu d'Uviéu o Caxastur, ye autora de los poemarios en castellán La caligrafía de la distancia (1993), y del poemariu n'asturianu En campu abiertu, col que llogró nel 2012  el Premiu "Teodoro Cuesta" de Poesía que convoca'l Conceyu de Mieres. Fonte: Europa Press