Pintar-Pintar edita "Yumper", una obra de Milio'l del Nido p'amantes de los animales

Campaña pa promocionar la llectura n'asturianu

Cubierta de "Yumper"

     "Yumper", “un perru singular”, ye’l protagonista de la creación última de Milio’l del Nido, obra que cuenta con ilustraciones de Carmen Saldaña.Pintar-Pintar edita esti llibru, con versión n’asturianu y en castellanu, destináu pa los amantes de los animales.

   Contada en primer persona, esta historia “tien pocu de cuentu y munchu de cierto”, como dexen cayer les ilustraciones de Saldaña, nes qu’apaecen un paisanu con cara y barba asemeyaes a les de Milio. Pero, ¿quién ye Yumper? “El ser humanu, dalgunes vegaes, ye bastante inhumanu nel tratu colos animales. Pero eso nun ye lo normal; lo normal ye que’l tratu con ellos nos faiga meyores, porque la nobleza de los irracionales fainos superanos; saca de nós lo más noble que llevamos dientro. Asina yera’l Yumper; bonu y ques nos facía bonos”, adelanta l’autor.

   Según espliquen dende la editorial, esti llibru ta destináu “pa los amantes de los animales, especialmente pa quienes tienen la suerte de compartir la so vida con dalgún d’ellos, quiciabes un perru y, sobre manera, pa los que saben el güecu que nos pueden dexar cuando yá nun tán”. D’igual forma, Yumper tamién ye una asociación cultural asturiana pa la defensa de los valores humanos creada nel 2010 que premia tolos años a aquelles persones o instituciones que destacaren polos sos valores humanos. La obra yá ta la venta na páxina web nueva de la editorial na so versión en llingua asturiana a un preciu de 4,95 euros dientro d’una campaña de Pintar-Pintar pa promocionar la llectura n’asturianu.                                Fonte: asturies.com