Una investigación espublizada na revista de mayor impautu científicu del mundu na educación conclúi que deprender asturianu meyora’l rendimientu n’otres disciplines

Los escolinos que cursen llingua asturiana obtienen meyores resultaos tanto en llingua castellana como en matemátiques

La revista de mayor impautu científicu del mundu nel campu de la educación, la Review of Education Research, de los Estaos Xuníos d’America, ta acabante d’espublizar un trabayu que recueye información alrodiu de los beneficios que tien l’enseñu de la llingua asturiana nel sistema educativu. Nesta investigación baraxáronse estremaos estudios alrodiu’l billigüismu nel enseñu que s’espublizaron en tol continente européu, pero al final emplegaron na so mayor parte los estudios fechos na Universidá d’Uviéu.

Esta espublización tomó comu referencia una investigación d’una tesis fecha na Universidá d’Uviéu y dirixía por Xosé Antón González Riaño na que s’obtuvieron unos resutlaos qu’amosaben que los escolinos que deprendíen llingua asturiana na escuela veíen ameyoraes considerablemente les sos competencies en distintes materies como son la llingua castellana y les matemátiques.

Nesti sen, los escolinos qu’estudien y deprenden llingua asturiana saben diferenciar bien ésta llingua de la castellana col consiguiente resultáu d’ameyorar considerablemente’l rendimientu en dambes llingües. Esto enllaza con que al facese tamién más competentes en llingua castellana aumentaba la so capacidá de comprensión llectora, colo que l’aprendizaxe, comprensión y razonamientu del llenguaxe matemáticu tamién se veía notablemente meyoráu.

Fonte: Infoasturies