La Conseyería d’Educación, Cultura y Deporte va facer efeutivos dellos recortes nes plantiyes docentes pal cursu 2013-2014. Compromisu por Asturies amuesa’l so esmolecimientu por esta situación qu’afeuta a alumnos y trabayadores.
Según esplica la formación nacionalista, la nota remitida pola conseyería a los centros esti mesmu mes nel qu’apaez detallada la previsión de places de profesoráu en Secundaria “dexa bien a les clares la disminución de los recursos humanos”. Al respeuto, recuerden a la conseyera Ana González que tresformar les xornaes completes de los docentes a medies xornaes “supón un retayu encubiertu que ye vendíu a la opinión pública con unes cifres totales que nun son tales, en tantu que nun ye lo mesmo cuntar con ochenta docentes a xornada completa qu'a media xornada, anque teamos falando del mesmu númberu”.
Estos recortes en plantiyes tamién afeutaríen a les escueles de 0 a 3 años, de titularidá municipal, según señalen dende Compromisu y dende’l Sindicatu Unitariu y Autónomu de Trabayadores de la Enseñanza d’Asturies (SUATEA). “La supresión d’educadores en toles escueles nun se basa na disminución de la demanda, sinón n’aforrar a costa de lo que sía: de la calidá del serviciu, de puestos de trabayu, etc. Porque con estos recortes, non sólo ta en peligru l’atención que reciben los usuarios de los mesmos, sinón tamién un bon númberu de puestos de trabayu que se van a suprimir; non modificar o treslladar, sinón a eliminar”, afirma’l sindicatu educativu, que recuerda que la función d'estos centros ye la de facilitar a les families nes que trabayen los dos miembros el dexar a los sos críos nun ambiente formativu.
Fonte: Asturies.com
Ye un varapalu pergrande pa les families y pa las educadoras que van dir a la cai dempués de llograr el so puestu de trabayu tres superar unoa duros exames y concursos. Estos retayos tamién son una roca nel camín pal incrementu de la natalidá. Retayos y más retayos tea quien tea nel poder, toos los políticos faen lo mesmu.
ResponderEliminarYe que la "clase política" (o meyor banda de bandidos) nun piensen más que en conservar el puestín y los sos grandes emolumentos (esos nun los retayen, non, les encrementen cada pocu tiempu) porque munchos, pero munchos munchos nun saben faer la "o" con un canutu porque nun tienen estudios y enxamás trabayaron n'otra cosa que nesmocedaes de los sos partidos políticos, y nun saben faer otra cosa que x.... a la xente y que erroquecerse ellos.
ResponderEliminar