La Rede de Museos Etnográficos d’Asturies ta acabante asoleyar nel so repositoriu dixital un nuevu trabayu del etnógrafu Daniel Cueli “Llavaderos. Censu del Conceyu Cabranes”. Na obra, l’autor fai estudiu de tolos llavaderos de Cabranes, apurriendo tolos datos posibles y semeya del so estáu actual. Daniel Cueli ye’l director de la revista “N’ast, cartafueyos d’ensayu” y autor de dellos trabayos nel campu de la etnografía, incluyendo unu asemeyáu a esti pero dedicáu a los llavaderos del conceyu de Sariegu. L’orixe d’esti censu ta nun estudiu que fizo nel añu 2011 y qu’apaeció asoleyáu na revista d’etnografía Asturies, memoria encesa d’un país: “Llavaderos na Comarca de la Sidra, Piloña y Siero”. Esti trabayu, xurdió del so interés "por poner en valor unes construcciones que nos sieglos XIX y XX xugaron un papel perimportante, meyorando enforma les condiciones de les muyeres na dura xera de llavar la ropa, pero poco reconocíu, polo menos dende’l puntu de vista académicu".
Y ye que según esplica Cueli "hasta esi momentu malapenes esistía bibliografía específico sobre estes construcciones n’Asturies, namás que referencies que nun pasaben d’unes poques llinies n’obres xenériques sobre etnografía, arquiteutura popular o sol papel de la muyer na sociedá tradicional asturiana".
L'estudiu inicial asoleyáu n'Asturies memoria encesa d'un país, fízose sobre la base d’un estensu trabayu de campu llevó al autor a visitar más de cien llavaderos nel ámbitu territorial acutáu pa facelu, pero nun incluyía un censu d’estes construcciones. "Esti fechu llevóme, precisamente pa completalu dafechu, a dir censando, pali que pali, toles construcciones esistentes y d’ehí esti documentu, que recueye’l censu llavaderos del Conceyu Cabranes y que vien a amestase al yá iguáu del Conceyu Sariegu", esplica l'autor.
Cueli comenta nel entamu del estudiu que los llavaderos de Cabranes tienen un estáu de conservación "regular, llegando a alcontrase construcciones en mui bon estáu pero tamién exemplares fechos una llaceria". En total, caltienense ventiséis, repartíos per toles parroquies cabraniegues, anque, esplica Cueli "la mayoría concéntrense, como ye lóxico, nes de más población, distribuyéndose de la manera que vien darréu: ocho en Torazu, siete en Fresnéu, cinco en Santolaya, trés en Pandenes, dos en Viñón y namás qu’ún na de Graméu".
Documentación:
L’etnógrafu Daniel Cueli asoleya un censu de llavaderos de Sariegu
Más información:
Descarga'l llibru de baldre
Fonte: Asturnews
Esti tipu de trabayos son básicos pa la conocencia y caltenimientu del patrimoniu tradicional del país. Norabona al autor.
ResponderEliminar¡Bien!
ResponderEliminarL'acabo de mirar i és extraordinari. Moltes felicitats a l'autor.
ResponderEliminarEs podria continuar aquesta bona feina amb la restauració dels que estan en pitjor estat i el manteniment dels altres amb grups de voluntaris.
Alantre coles bones idees.
ResponderEliminarTan faciendo una perbona llabor.
ResponderEliminarMunchu trabayu, munches ganes y muncha moral ¡alantre!
ResponderEliminarDende equí un bon reconocimientu pa los de la Sociedá Cultural El Garrapiellu de Xixón, con munchu méritu y con munchos kilómetros caminaos y munchos monumentos perbién señalaos a la vera los caminos y les caleyes, como lo del románicu xixonés p. ex.emplu y otres coses de mayor y de menor importancia. reconocimientu a los voluntarios de la cultura astur y xixonesa.
ResponderEliminarMunches gracies polos vuesos comentarios, animen a ún a siguir nesta xera. Un saludu, Daniel Cueli.
ResponderEliminar