XV Concursu de Cuentos pola Oficialidá del Asturianu

Pablo R. Guardado
El Conceyu de Bimenes ta acabante de convocar la decimoquinta edición del Concursu de Cuentos pola Oficialidá del Asturianu. El plazu pa la presentación de los trabayos, qu’han de tener un máximu de diez fueyes, final’l 30 de mayu.

Tolos rellatos han de ser inéditos y deben tar redactaos en llingua asturiana respetando les normes ortográfiques vixentes. Éstos nun deben esceder les diez fueyes, mecanografiaes a doble espaciu per una cara, según marquen les bases del concursu. Los participantes han de presentar un orixinal del cuentu, tres copies del mesmu y otra más en CD baxo un nomatu que debe apaecer nuna plica con tolos datos personales y un currículu con semeya.

Un xuráu formáu por trés persones cualificaes y presidíu pol alcalde de Bimenes, José Emilio González Aller, va decidir el ganador del concursu, que va llevase 700 euros. El segundu y el tercer clasificáu tamién van llograr una recompensa de 450 y 300 euros. L’apertura de pliques va tener llugar el 26 de xunu y la entrega de premios, como ye vezu, va celebrase na Fiesta de la Oficialidá de la Llingua Asturiana con una llectura pública de la obra ganadora por parte del so autor.

Los interesaos en participar nel XV Concursu de Cuentos pola Oficialidá de Bimenes han d’unviar la so creación nun sobre al Conceyu de Bimenes –faciendo referencia al concursu– na direición Martimporra, s/n, códigu postal 33527 (Bimenes). En casu de duldes sobre’l funcionamientu del certame, la organización pon a disposición de los concursantes un teléfonu: el 985.700.004. Na edición del añu pasáu, el ganador d’esti concursu foi Nacho Fonseca cola obra ‘Lluis’. Mentes, el segundu premiu llevólu Quique Faes Díez, con ‘Tengo un plan’, y el terceru Pablo Rodríguez Alonso con ‘¿Qué coño bebe un zulú?’.

Fonte: Asturies.com