Iniciativa pol Asturianu llamenta la situación de dellos servicios de normalización

Pablo R. Guardado La situación na que s’alcuentren dellos servicios de normalización llingüística ye motivu d’esmolecimientu pa Iniciativa pol Asturianu. Esti coleutivu demanda un compromisu políticu y económicu al Gobiernu y a los conceyos. En concreto, Iniciativa por Asturianu refierse a los servicios de les mancomunidaes d’Avilés y n’especial, al d'El Cabu Peñes, “onde la engarradiella ente'l PP y el PSOE pue afeutar a la continuidá del so SNL. De fechu, el francimientu de dicha mancomunidá supondría que, polo menos, los gozoniegos quedaren privaos d'un serviciu que lleva furrulando dende’l 2004”. El coleutivu considera que la inestabilidá qu’atopen tolos servicios de normalización del país débese a “la falta d'un conveniu ente'l Gobiernu del Principáu d'Asturies y los conceyos, que faiga de los SNL un serviciu fixu del so organigrama”, asina como d’un “compromisu políticu y económicu” de les alministraciones. Sobre la situación de la Mancomunidá d’Aviles, tamién fai referencia a la creación anunciada del SNL d’Illas y Castrillón, lo que considera que nun ye “un plan coherente de política llingüística”, al quedar fuera Avilés –con serviciu propiu– y Corvera, que cola xida de la crisis vio cómo se pesllaba la Casa de la Llingua pese a tener una partida alcordada, al igual qu’asocedió col de la Mancomunidá del Sueve. Asina, Iniciativa pol Asturianu critica que la Mancomunidá d’Avilés, nes sos propuestes de coordinación de programes, fale “d'oficines d'información a la mocedá, de consumu y de los telecentros, pero non de la normalización llingüística”. “Poro, dende Iniciativa pol Asturianu, esiximos a diches mancomunidaes qu'igüen un plan pa que tolos conceyos que les formen puedan ser atendíos por un SNL”, destaquen dende’l coleutivu. Campaña de captación de socios Iniciativa pol Asturianu entamó esta selmana una campaña de captación de socios-miembru, cuota que tien un coste de 7 euros mensuales o 60 añales, coincidiendo col Día del Llibru (23 d'abril) pola que toles altes van recibir de regalu un llibru. Amás, con motivu de la Selmana de les Lletres Asturianes, anuncia’l sortéu d’un llote de 10 llibros y revistes ente tolos socios. Fonte: Asturies.com