El Conceyu de L.lena acaba de presentar la campaña Los nomes de llugar nun tienen preciu, garra’l tuyu, que consiste na edición de chapes y pegatines cola toponimia tradicional y oficial del conceyu. La campaña tien como oxetivu fomentar l’usu de los nomes oficiales de L.lena. Pa ello, editáronse 2.000 chapes con topónimos, que se van repartir en fiestes de pueblos y nos servicios del Conceyu, y 300 pegatines d'apegar en cristal col topónimu L.lena.
La idega ye ponese en contautu coles comisiones de fiestes y ofrece-yos esti material como promoción tamién de los llugares. De mano, editáronse chapes de Payares, Carabanzo, Campumanes, Casorvía, La Vega’l Ciigu, Tuíza, Xomezana, amás de chapes de L.lena. Dende’l Serviciu de Normalización Llingüística quieren que les fiestes más importantes del conceyu tengan como regalu pa les vecines y vecinos esti material. El Mercáu Tradicional de La Pola, que se va celebrar esti fin de selmana, va ser l’escenariu del primer repartu de chapes pola entidá organizadora. La intención ye siguir editando chapes a tenor de les peticiones de les comisiones de fiestes. Otra manera, col oxetivu de reforciar y fomentar el nome del conceyu, va repartise una pegatina ente los comercios y chigres l.lenizos.
La campaña financióse con una sovención de la Conseyería de Cultura y Deporte. Fíxose en collaboración cola rede de Normalización Llingüística nos Conceyos y participaron nella, amás de L.lena, los conceyos de Llaviana, Mieres, Samartín del Rei Aurelio, Siero y Mancomunidá de la Sidra. Hai una segunda fase de la campaña que va consistir na grabación d’un videu con xente relevante de cada conceyu apoyando la toponimia tradicional y qu’espera poder emitise nos cines y nos centros escolares.
Fonte: Les Noticies
Necesítase darréu la reconocencia oficial de la llingua, necesítase yá.
ResponderEliminar