L’asturianu nuna manifestación polos drechos llingüísticos en Francia

La organización Xunta Moza tuvo apoyando una manifestación a favor de los drechos de les llingües minorizaes en Francia. L’actu reivindicativu foi’l sábadu 31 de marzu baxo l’eslogan «Nos langues, un droit, une loi» y trescurrió en varies ciudaes del Estáu francés, ente les que taben Tolosa, Kemper, Straassburg, Perpinyá, Ajacciu, Metz, Rijsel y Baiona, que foi’l llugar a onde s’acercó la delegación de Xunta Moza encargada de representar a Asturies en solidaridá coles otres fales minoritaries que tán nuna situación asemeyada a la del asturianu.

La manifestación convocábase “col envís de reclamar, per un llau, el reconocimientu de la diversidá y de los drechos de los falantes de llingües minorizaes; per otru, la ratificación francesa de la Carta Europea de les Minoritaries y, p’acabar, la cooficialidá d'estes llingües nos sos territorios”.

Na manifestación de Baiona, onde tuvo Xunta Moza participaron alredor de 8.000 persones con pancartes, banderes y gritos. Llucía Menéndez, miembru de Xunta Moza -plasmada al ver tanta xente nuna manifestación llingüística- dicía: «Cuando tuviemos en Bretaña nel alcuentru de llingües minorizaes, Ai’ta, organización de referencia na defensa del bretón, taba celebrando una asamblea xeneral, xustamente, pa preparar esta manifestación. Nun podíemos faltar». La protesta que duró cuasi dos hores, con un percorríu de dos quilómetros, anduvo la parte antigua de la ciudá vasca.

Xunta Moza llevó una pancanta col llema: «Yá, yá, yá: oficialidá. La mocedá en llucha pola llingua asturiana». Les ocho persones que diben aguantándola asitiáronse nun furaquín qu’había na llarga filera de públicu y, como nun podía ser d’otra manera, sobre ellos y elles recayó l’almiración de los locales y de los periodistes: «¡cuándo se vio que dende tán llueñe s’allegase un grupu de manifestantes p’apoyar un tema llingüísticu!» Dalgún reporteru entrugó-y a Marina Pangua, integrante de Xunta Moza, por qué tábemos ellí; la respuesta foi clara: «Tamos equí porque n’Asturies vivimos nuna situación bien paecía a esta: nun se nos reconocen los drechos a los falantes y nun tenemos un compromisu institucional que nos asegure la oficialidá de la nuesa llingua. Tamos equí pa solidarizanos cola vuestra causa porque, a fin de cuentes, somos compañeros na llucha».

A la fin de la manifestación, los miembros de Xunta Moza aprovecharon pa estrenchar llazos y pa intercambiar opiniones coles persones de la organización del eventu, y con xente qu’asistía dende Occitania, Euskal Herria, Catalunya y otros llugares. Ye pa destacar la conversación con Fermín Muguruza, conocíu activista vascu, quien punxo’l so granín d’arena al posicionase d’alcuerdu cola oficialidá del asturianu, y quien manifestó la necesidá de texer redes solidaries y d’intercambiu ente falantes minusvaloraos pa, xuntos, entamar aiciones comunes, como yera nesti casu, l’asistencia de Xunta Moza a esti actu reivindicativu.

Fonte: Asturnews