Iniciativa pol Asturianu aconceyó con organizaciones de Lleón y Zamora na defensa del idioma

Dientru de la rolda d'alcuentros con coleutivos en defensa del idioma.

Según asoleyó na so web, Iniciativa pol Asturianu vien d'aconceyar con organizaciones pertenecientes al movimientu de reivindicación llingüística en Lleón y Zamora, alcuentru que tuvo llugar na sede de La Caleya, n'Estorga (Lleón). Según despliquen, "Iniciativa pol Asturianu quixo conocer de primera mano'l llabor y l'actividá qu'éstos vienen desendolcando en Lleón y Zamora, asina como abrir canales de comunicación y cooperación futures".

Nel aconceyamientu hebo representantes de Furmientu, Faceira y La Caleya, colos qu'intercambiaron impresiones "pa facer una defensa unánime de la llingua qu'une a bona parte de Zamora y Lleón con Asturies". Amás, dende IpA despliquen que'l so enfotu "ye plantegar aquellos proyeutos que seyan d'interés pal idioma en dambos territorios y llevar alantre aquellos que puedan ser válidos a tol dominiu llingüísticu de manera conxunta", asina como "la voluntá firme de la organización por afitar una conexón sólida con tolos territorios onde l'asturianu ye llingua propia, espeyada na creación de la vocalía de dominiu llingüísticu, qu’organizó esti aconceyamientu".

Pa finar, afiten que "púnxose atención ente otres cuestiones na situación esmolecedora que vive l'idioma al sur del cordal; na perda progresiva de falantes, na ausencia total de lleis que garanticen los sos drechos, na falta de prestixu social y na falta d'actuaciones de puesta en valir del patrimoniu llingüísticu y inmaterial como recursu que ye y como fonte de desenrollu social y económicu".

Fonte: Infoasturies