El Tercer Home nun lu escribiera Graham Green pa lleelu sinón pa velu. Y si amás, podemos sentilu n’asturianu, muncho meyor. La empresa asturiana Gonzali Producciones www.gonzaliproducciones.com tien editada una colleición de cine clásicu n’asturianu, que nel intre axunta tres títulos: un clásicu de les pelis de zombis La nueche de los muertos vivientes (2010); El tercer home (2011); y un afamáu western que protagoniza John Wayne, McLintock (2011). Podemos echa-y un güeyu na so páxina web onde podemos esfrutar de fragmentos d’estes películes n’asturianu. Amás, apúntanos dellos puntos de venta n’Asturies onde poder mercales, mui afayadizu pal Nadal.
El Tercer Home ye una película británica del añu 1949, dirixía por Carol Reed. El guión, que foi la novela d’encargu, foi escritu por Graham Green. El film tuviera dellos premios y nominaciones al Oscar, algamando el merecíu premiu a la meyor fotografía en blancu y prietu por Robert Krasker. Ye una peli d’intriga nuna Viena ocupada nel añu 1948, que taba separtiada en cuatro potencies: norteamericana, rusa, francesa y británica. Lo que encadarma un documental en blancu y prietu con perbonos esteriores que describen les distintes facetes de la ciudá de Viena naquella época de posguerra.
Amás, ye mui prestosu escuchar a Orson Welles falando n’asturianu, nel personaxe de Harry Lime, el malu de la película. Demientres sentimos la cítara de Anton Karas, nuna melodía perafamada qu’acompanga la película d’un forma esceicional.
El Tercer Home asitió la lliteratura de Graham Green nuna estaya mundial. Y danos la oportunidá d’escoyer: lleer el llibru o esfrutar de la película. De xuru, que les dos coses merecen la pena. Porque los clásicos nunca pasen de moda, y como amuesa d’ello finamos coles pallabres de Harry Lime nun diálogu de la película:
“Alcúerdate de lo que dixo nun sé quien: n’Italia, en trenta años de dominación de los Borgia, hubo guerres, matances, asesinatos,…Pero tamién Miguel Angel, Leonardo y el Renacimientu. En Suiza, a la escontra, tuvieron quinientos años d’amor, democracia y paz. ¿Y cuálu fuera’l resultáu? ¡El reló de cucu!”
A ver lo que resulta anguaño d’estos tiempos de crisis y cambeos políticos. ¿Taremos a la gueta d’un tercer home que daquién viera pero que nun aparez nos informes oficiales?
Perinteresante entrada, gracies pol conseyu Xira.
ResponderEliminarEl més divertit és que en 500 anys els suïssos no van inventar ni el rellotge de cucut; és un invent alemany.
ResponderEliminarTamos a la espera de la prósima entrega, esto ye la prósima pingarata lliteraria, bien...
ResponderEliminar