L’actu va tener llugar nel salón d’actos de la Biblioteca d’Asturies
L’asociación Iniciativa pol Asturianu va presentase esti sábadu 17 d’avientu nel salón d’actos de la Biblioteca d’Asturies, n’El Fontán, Uviéu. L’actu va consistir nuna pequeña gala con intervenciones, proyeición d’audiovisuales y actuaciones musicales, amás d’otres sospreses. Iniciativa pol Asturianu ye, según espliquen dende la Xunta Promotora de l’asociación “una organización que ñaz pa implicar a tola sociedá asturiana nel procesu de recuperación y normalización del asturianu”. El so trabayu va centrase tanto nel sector públicu como nel priváu “a la busca de nuevos espacios de normalidá pal idioma asturianu”.
L’asociación, añeden, “entama la so actividá pública dempués de dellos meses de trabayu discretu pa xenerar una estructura, crear la so páxina web, materiales y dir xenerando una rede de voluntariáu a lo llargo de tol territoriu asturianu”.
Convidada al actu de presentación
Nel actu d’esti sábadu, presentáu pola periodista Mariluz Pontón, va poder sentise la música de Mariluz Cristobal Caunedo “la dama de la canción asturiana”, amás de Tante Blanco, ex miembru de Los Berrones. Amás, habrá espaciu pal humor, de la mano del monologuista Lluis Antón González, perconocíu pol so trabayu como humorista na TPA. Xunto a estos elementos más lúdicos, presentaránse les idegues básiques del coleutivu y, amás, participarán delles personalidaes de diferentes estayes de la sociedá asturiana: educación, medios de comunicación, arte y cultura… Nel actu espérense delles sospreses que la organización entá nun desveló.
L’actu va entamar a les siete la tarde y ta abiertu a tolos interesaos, de baldre y hasta enllenar l’aforu del salón d’actos de la Biblioteca d’Asturies.
Folixa nel chigre L’Esperteyu
En terminando l’actu, hacia les nueve, va celebrase una folixa nel chigre uvieín L’Esperteyu, asitiáu en La Caleya la Ciega.
Fonte: Asturnews
perbona iniciativa que venceyará tresversalmente a toles estayes de la sociedá.
ResponderEliminarLa mio opinión sobre esta nueva asociación que nel mio casu ye conocida por comentarios ya informaciones n'Internet ye qu’entama con bones intenciones, falando cola Academia, cola Xunta y col que quiera sofitar la llingua dende una visión plural y non politizada esperemos que siga siendo esa la idea y que podamos ente toos consiguir la oficialida y la reconocencia fora de Asturies
ResponderEliminarCreyo que L'Esperteyu fai esquina con La Caleya la Ciega pero que ta na cai La Vega.
ResponderEliminarPaez que s'estiende'l "modelu CUPA" de reivindicación virtual y aprovechadiza.
ResponderEliminar