7/9/10

IV Premiu Timón pa Roberto González-Quevedo


Un xuráu integráu por Alberto Álvarez Peña, Vicente García Oliva, Aurora García Rivas, Humberto Gonzali, Jorge Espina, Inaciu Iglesias y Xuan Xosé Sánchez Vicente, alcordó güei otorgar el IV Premiu Timón, p’autores en llingua asturiana y gallego-asturianu, al autor lleonés Roberto González-Quevedo.
Esta distinción, que consiste nuna obra del escultor y ceramista xixonés Jesús Castañón, va entregase nun actu entamáu pal 23 de setiembre, a les 20 hores, nel xixonés Centru Municipal Integráu de L’Arena, nel marcu d’actividaes de L’Arribada 2010. La entrega del gallardón tará acompañada cola actuación del Cuarteto Antolín de la Fuente.
Los ganadores anteriores fueron, en 2007, Nené Losada Rico, en 2008, Xuan Xosé Sánchez Vicente y, en 2009, Manuel García ‘El Galano’.
Roberto González-Quevedo ye un escritor, filósofu, antropólogu y llingüísta nacíu en Palacios de Sil, provincia de Lleón, en 1953. En 1981 algamó’l Premiu de Narraciones Curties de la Diputación d’Asturies (antecesor del Xosefa Xovellanos) col so relatu Pul sendeiru la nueite. Ye miembru de númberu de l'Academia de la Llingua Asturiana ocupando anguaño'l cargu de secretariu, y direutor de la revista Cultures, editada pola Academia asturiana y dedicada a temes antropolóxicos y etnográficos.

Fonte: L'Arribada

1 comentario:

  1. Bien merecíu a ún de los cabezaleros de la nuesa cultura nacional.

    ResponderEliminar

Los comentarios tán pendientes de moderación. Espublizaránse lo primero dable.