Falten cursos d'asturianu na Casa de les Llingües de la Universidá d'Uviéu

El Conceyu Universitariu pol Asturianu (CUPA) quier amosar otra vegada, como yá fizo nel mes de mayu col anunciu de los cursos pal cursu 2010/2011, el so descontentu cola direición de la Casa de les Llingües de la Universidá d’Uviéu pola falta d’ufierta de cursos d’asturianu dende l’entamu de la so actividá, va yá cuasi un añu y mediu.

Vicente Gotor, Reutor de la Universidá d’Uviéu, prometiere que la Casa de les Llingües diba incluyir nel so programa cursos de llingua asturiana, un serviciu qu’ufriéndose embaxo demanda nun tendría nengún gastu estraordinariu pa la Universidá d’Uviéu.

Ye’l momentu de que la Casa de les Llingües apurra a los alumnos cursos d’asturianu y de qu’usen la nuesa llingua de forma normal. Como exemplu, la páxina web de la institución ye una de les poques de la Universidá d’Uviéu que nun ufierta versión n’asturianu, dempués de la renovación del portal “uniovi.es”.

Direición del Conceyu Universitariu pol Asturianu

Fonte: CUPA Blogue Asturies GuGara.com