Valdesoto vive les décimes Xornaes de Mazcaraes d'Iviernu

Participen diez grupos de mazcaritos d'Asturies, Cantabria, Galicia y Portugal

  Les Xornaes de Mazcaraes d'Iviernu qu'entama l'Asociación pa la Recuperación de Los Sidros y Les Comedies 'El Cencerru' vive la so décima edición con un programa d'actividaes que s'anició'l miércoles cola inauguración de la esposición 'Vuelven los Aguilandeiros'. Ésta pue visitase hasta'l domingu nel Centru Polivalente de Valdesoto n'horariu de 17 a 21 hores, güei y mañana, y de 12 a 18 hores, el domingu, y ta formada por semeyes feches por Mara Herrero de les mazcaraes de San Xuan de Villapañada, Tormaleo y El Valledor, acompañaes por testos fechos por Xosé Antón Fernández 'Ambás' y Ramses Ilesies.

 Esta tarde van celebrase les tradicionales charres nesi mesmu llugar, que nesta ocasión tan especial van protagonizar Enrique Escudero, xefe de serviciu de Patrimoniu Cultural de la Conseyería d'Educación y Cultura, cola conferencia 'Sidros y Comedies: Una mazcarada de Bien d'Interés Cultural'; Óscar González, que va falar 'Sobre la vistimenta del Sidru'; y Carla Menéndez 'Perucho', que va afondar sobre 'Los Sidros na escuela. Un Antroxu diferente'. L'actu, que va presentar el periodista y fotógrafu Iván García Fernández 'Esguil', va zarrase cola proyeición del documental 'Aguilandeiros de San Xuan. Recuperación d'una mazcarada del Conceyu Grau', una cinta de Producciones Estoupo con Ambás y el Grupu Xeitu.

Desfiles 

 Mañana, a les 17.30 hores, va entamase un desfile peles cais de La Pola Siero, mentes que'l domingu va desendolcase'l tradicional pel Valdesoto, con salida al meudía del campu de fútbol y final nel Campu la Ilesia. Nesta ocasión, amás de los propios Sidros y La Comedia, a los qu'hai que sumar los Escolinos de Faes, convidóse a otres nueve mazcaraes: O Chocalheiro de Bemposta, O Chocalheiro de Vale do Porco, Careto de Valverde, Farandula de To y Vhelos de Bruçó, de la zona portuguesa de Mogadouro; Os Caretos de Parada, del territoriu cercanu a Bragança tamién de Trás-os-Montes; Os Fullons y Boteiros de Viana do Bolo, y Madams y Galans de Cobres (Galicia); Zamarrones de Piasca (Cantabria); y Guilandeiros de Tinéu, que van pidir l'aguilandu poles cases de la parroquia.
Fonte: asturies.com