Conseyería y ministeriu siguen ensin llegar a un alcuerdu pa la creación de la especialidá docente

• . El Gobiernu estatal frena la creación de la especialidá docente de Llingua Asturiana por tar en funciones
• . Alonso va acudir el llunes a Madrid pa retomar la negociación de la creación de la especialidá docente

Na imaxe, Marcial Marín, semeya de TeleToledo Noticias baxo llicencia CC BY 4.0.

  “Arrincamos el compromisu de caltener reuniones posteriores”. Asina resumió’l conseyeru d'Educación y Cultura, Genaro Alonso, la reunión del llunes en Madrid col secretariu d’Estáu d’Educación, Formación Profesional y Universidades, Marcial Marín. La creación de la especialidá docente sigue paralizada.

  Alonso, que tuvo acompañáu por Fernando Padilla, direutor xeneral de Planificación Llingüística y Normalización, treslladó a Marín y al direutor xeneral d’Evaluación y Cooperación Territorial, José Luis Blanco, la necesidá de modificar los reales decretos d’especialidaes de Primaria y Secundaria del 2008 pa encaxar, como s’algamó cola LOMCE, qu’aquelles comunidaes con llingua propia non oficial pero con implantación curricular puedan desarrollar la especialidá docente de dichu idioma. “Nestos momentos tán en tramitación, per parte del Estáu, el reconocimientu de la tonada asturiana como especialidá docente pa los conservatorios de música y la tonada nun ye cooficial, igual que nun lo son otres llingües como’l llatín, que sí cuenten con especialidá docente”, apuntó’l conseyeru.

  Lo cierto ye que Marín, que paralizara’l procesu l’añu pasáu por tar el Gobiernu estatal en funciones, namái se comprometió a caltener reuniones posteriores pa siguir aldericando sobre esti asuntu, lo qu’allarga un procesu que s’anició cola anterior conseyera, Ana González, que se comprometiera a zarralu na llexislatura pasada. “La posibilidá de modificación de los reales decretos ye téunicamente factible y amás nun invade competencies ministeriales, nin colisiona cola llegalidá vixente”, insiste Alonso.
Fonte: asturies.com