Les bases del Premio Café Gijón dexen fuera otra vegada l'idioma

• . Iniciativa demanda que'l 'Premio de Novela Café Gijón' permita la participación d'obres n'asturianu
• . El concursu de rellatos de Villaviciosa será finalmente pa testos n'asturianu

 El Conceyu de Xixón nun atiende les reclamaciones feches por Iniciativa pol Asturianu por esta discriminación.

 En mayu del añu pasáu, la organización que trabaya pola normalización del idioma denunciaba esta situación. Agora, tres abrise'l pasáu 20 de febreru'l plazu pa presentar obres al Premio de Novela Café Gijón 2017, vuelve a facer públicu esti casu de marxinación al asturianu. "Ye un drechu llingüísticu que la convocatoria seya también n’asturianu y reclamamos al Conceyu de Xixón que se faiga la modificación precisa nes bases pa que o bien, se cree una categoría pa obres n'asturianu o bien, se permita la presentación d'obres nel idioma que les Ordenances d'Usu del Asturianu de Xixón recueyen como propiu", apunten dende Iniciativa pol Asturianu.

 "Ésta ye una midida de costu cero, yá que nun supondría añadir un mayor presupuestu del yá aplicáu, y que daría un importante prestixu a les obres lliteraries n'asturianu pues pasaría a ser el concursu nesti idioma con una mayor dotación", añade'l coleutivu. Nesi sen, recuerda'l casu del Conceyu de Villaviciosa, que rectificó y modificó la convocatoria del I Premio de Relatos Ayuntamiento de Villaviciosa, nun primer momentu pa obres "en lengua española", pa convertiu nun certame pa rellatos en llingua asturiana.

Café Gijón, Madrid

 "Iniciativa pol Asturianu pide por otra vegada, tanto al equipu de gobiernu como a les fuercies presentes nel Plenu, qu'impulsen esta reforma y el Premiu Café Gijón seya una forma más de potenciar la creación lliteraria, y con ello, sofitar el procesu de normalización social del idioma, acabando asina con esta discriminación que fai que dende va cuasi trenta años los autores nun puedan presentar obres n'asturianu", fina'l comunicáu asoleyáu pola organización. El Conceyu de Xixón garró nel 1989 el testigu de la organización d'esti premiu de novela creáu nel 1949 por iniciativa de Fernando Fernán Gómez col nome tertulia que se reunía na cafetería madrilana que llevaba'l topónimu castellanu de la ciudá asturiana.

 D'esta forma nun morría esti gallardón lliterariu, que nel 2016 llevó la malagueña Isabel Bono con 'Una casa en Bleturge', y que cuenta con una recompensa de 20.000 euros.   
Fonte: asturies.com

Adxuntu	Tamañu
Bases del Premio de Novela Café Gijón 2017	29.21 KB