“Dame tristura ver esti hemiciclu vacíu”, afirma Pilar Rubiera

Na imaxe, Pilar Rubiera y Ramón d'Andrés

 Pilar Rubiera espresó la so tristura énte la probe presencia de diputaos na cuarta sesión de comparecencies informatives de la Comisión Especial d’Estudiu sobre'l Réxime de Proteición y Promoción del Asturianu. La periodista intervino xunto con Ramón d’Andrés, Xuan Bello y l'escultor Adolfo Manzano.

 L'ausencia, mientres ciertos momentos de la sesión, de los representante de Podemos, Lucía Montejo, que siguió la sesión dende la cafetería por temes de salú y llueu acudió al turnu d’entrugues, y el de Ciudadanos, Nicanor García, xuníos a la habitual del de Foro y al circunstancial “por compromisos” de la FSA-PSOE, según espresó la presidenta de la comisión Concha Masa (Izquierda Xunida), dexó una imaxe más llaceriosa entovía del Salón Constitución de la Xunta Xeneral que n’ocasiones anteriores, dalgo que nun pasó desapercibío pa Rubiera. “Dame tristura ver esti hemiciclu vacíu”, apuntó al tiempu que recordaba presenciar esi mesmu llugar con muncha vida n’otres ocasiones.

 La periodista enantes asegurara “nun entender el desdeñu institucional pol asturianu" y aseguró que “les llingües fáenles los falantes, pero les instituciones polítiques han de liderar el procesu que permita calteneles”. Mientres, no que respeuta al so sector profesional, llamentó qu’hubiere pocos periodistes que dominen l’asturianu y que nes redaiciones de los medios de comunicación privaos hubiera “falta d'amor a la tierra; d'entender ónde tamos y quiénes somos”.

 "Si los parllamentarios falaren n'asturianu, los periodistes tendríen que treslladar n'asturianu les sos pallabres. D'esta forma, estos profesionales ameyoraríen el so usu del idioma. Tresformaría munches coses y daría visibilidá al idioma", señaló darréu Rubiera.

“Asturies pue modular una oficialidá propia”

 El profesor de Filoloxía de la Universidá d’Uviéu y coordinador del Seminariu de Filoloxía Asturiana centró la so primer parte de la so intervención na situación del mínor d’asturianu, “que ye preocupante y afeuta al so sentíu de ser” y demandó que fora la única vía p’acceder al Master de Secundaria que permite poner clase de Llingua Asturiana, yá que les otres “son, na práutica, auténticos coladeros”. Sicasí, apuntó que ye dalgo que dixo que ta cerca d’una solución.

 Tres recordar la necesidá de que’l mínor pase a ser mención, yá como ciudadanu, faló de la situación del idioma “tres 43 años de reivindicación llingüística”. “L’asturianismu tenía aspiraciones que diben más allá de lo que la sociedá civil podía asumir”, apuntó, pa depués destacar los avances algamaos pola propia sociedá civil que provocó que “en pocu tiempu  l’asturianu equiparóse más de lo que les élites polítiques podíen vaticinar” nun primer momentu.

 Más alantre, D’Andrés destacó que dicha sociedá civil “ta dándonos una lleición. Los políticos han de ponese les piles" y espuso a los presentes que “Asturies pue modular una oficialidá propia”. “Nun ye igual la oficialidá del eusquera nel País Vasco qu’en Navarra”, esplicó.

Los cuatro comparecientes

Deficiencies na escolarización

 Bello, pela so parte, treslladó’l so discursu al ámbitu lliterariu, destacando que  la lliteratura asturiana "foi y ta siendo un auténticu milagru". L’autor calcó nel estáu de “desamparu” que viven los escritores qu’empleguen l’idioma y criticó l’ausencia nel país de dalguna “institución que protexa y vele pola creación n'asturianu, escrita o audiovisual”.

 "Dar una conferencia n'asturianu o gallego-asturiano n'Ibias ye más díficil qu'en Nueva York, y falo por esperiencia", añadió Bello, que tamién trató sobre l’ausencia de ferramientes por parte del llector pa enfrentase a un testu lliterariu n’asturianu, motivaes en gran parte por una escolarización “deficiente” en llingua asturiana.

Crítica a la Llei d’Usu

 Manzano fixo una crítica de la situación xurídica del idioma y demandó polítiques pa llegar a la oficialidá, al tiempu que criticó la Llei d’Usu y Promoción del Bable/Asturianu. "Too esti tiempu demostró d'Usu nun foi eficaz, anque sí que paez qu’algamó’l so oxetivu: el desaniciu del asturianu”, afirmó.

 L’escultor sacó a alderique les definiciones acientífiques sobre l’asturianu nos llibros de testu y destacó la perda del idioma ente les xeneraciones nueves: “Hai neños que nun saben lo que ye una caleya”. D’igual forma criticó tamién el tratamientu n’Asturies de los bienes culturales, non sólo de la llingua asturiana.

 No que respeuta a les intervenciones de los políticos presentes, destacaron les pallabres de García, qu’aseguró que’l so grupu parllamentariu “va avanzar pa que nun se nos muerra nes manes esa riqueza que tenemos”. Mentes, el representante del Partido Popular, Pedro de Rueda, criticó l’ausencia de diputaos d’otros grupos mientres la sesión y confesóse llector de Bello.

 La próxima sesión de comparecencies de la Comisión Especial d’Estudiu sobre'l Réxime de Proteición y Promoción del Asturianu nun va celebrase hasta’l 10 de mayu, cuando tán convocaos María Lavilla Mezinger, responsable de Crivencar; Adrián Morán Suárez, de Sidra L’Allume; Sergio Rodríguez, empresariu de Tutu Estudios; Esther Prieto, d’Ediciones Trabe; Ángela Sánchez Vallina, de Pintar-Pintar; l’escritor y periodista Inaciu Galán; Antón Álvarez Sevilla, criador de races autóctones; y David Marcos Antón, de Bodegas Obanca.

Na cuenta de Twitter d’Asturies.com comentamos en direuto tola sesión. Calcando nesti enllaz pue consultar cómo se desendolcó la mesma minutu a minutu y conocer tolos comentarios de los comparecientes y representantes políticos.                 Fonte: asturies.com