13/1/17

Xuan Bello lleva’l Primer Premiu Nacional de Lliteratura Asturiana


Na imaxe Xuan Bello, Primer Premiu Nacional de Lliteratura Asturiana

   El Premiu Nacional de Lliteratura Asturiana, gallardón del calter triañal creáu pola Academia de la Llingua Asturiana (ALLA) cola fin de reconocer toda una trayeutoria lliteraria d’un autor o autora, yá tien primer destinatariu. El xuráu del gallardón decidió concedelu a Xuan Bello tres escoyer ente una llista definitiva de cinco candidatos.
 Fernando Padilla, direutor xeneral de Planificación Llingüística y Normalización, que fixo’l llabor de secretariu del xuráu, encargóse de facer públicu’l fallu d’esti gallardón que va entregase con motivu del XXXVIII Día de les Lletres Asturianes. Asina, anunció que’l primer Premiu Nacional de Lliteratura Asturiana fora pa Bello pola “estraordinaria calidá y relevancia de la so trayeutoria lliteraria (qu’amiesta poesía y narrativa), que vien xugando un papel fundamental na dignificación y visualización de la lliteratura asturiana y de la propia llingua, asina como pola mor de la proyeición estatal ya internacional qu’algama la so obra con numberoses traducciones a estremaes llingües”.
 Amás de Bello, aspiraben al gallardón tres una escoyeta ente les candidatures recibíes, Antón García, Roberto González-Quevedo, Berta Piñán y Xuan Xosé Sánchez Vicente. “Cualquiera d’ellos yera merecedor del premiu”, apuntó Padilla.
 El xuráu del Primer Premiu Nacional de Lliteratura Asturiana, que la presidenta de l’ALLA, Ana María Cano –tamién presidental de xuráu– anunció’l pasáu Día de les Lletres pa “reconocer la contribución, de primer orde, de los escritores a la dignificación y normalización de la llingua”, tuvo formáu polos académicos de númberu Xosé Antón González Riaño, Xosé Ramón Iglesias y Carmen Muñiz Chacón; y los profesores de la Universidá d’Uviéu José Luis García Martín y Leopoldo Sánchez Torre. Éstos tomaron la decisión tres una esposición de méritos de los candidatos, un alderique posterior y delles votaciones.       Fonte: asturies.com

7 comentarios:

  1. La obra, la trayectoria, y el compromisu de Xuan Bellu cola llingua asturiana son dignos de méritu y esti Premiu ye xusto la bigornia de tales trabayos. Norabona por pasar a la hestoria de la lliteratura asturiana.

    ResponderEliminar
  2. Felicitats al premiat i felicitats a l'ALLA per crear un premi important. I que sigui nacional, millor encara.

    ResponderEliminar
  3. Asina ye David, ye una noticia, un pasu alantre y una novedá cultural bien importante, Felicidaes a la l'ALLA y al primer premiáu Xuan Bello.

    ResponderEliminar
  4. Esti premiu ye lo que mos faltaba pa tar al altor de les lliteratures modernes.

    ResponderEliminar
  5. Ye otru pasu perimportante escontra la oficialidá del asturianu y si hai dalguna dulda al respective, va vese bien puestu.

    ResponderEliminar
  6. Sí, Llugás, este ye'l bon camín y creo que bien directu, una gran idea de l'Academia de la Llingua Asturiana. A siguir por esta sienda.

    ResponderEliminar
  7. Magnífica la poesía y guapu el panexíricu de Teixeiro.

    ResponderEliminar

Los comentarios tán pendientes de moderación. Espublizaránse lo primero dable.