2/1/17

L’asturianu nel ámbitu internacional



Repitímoslo munches vegaes, los problemes del asturianu tán n’Asturies y nos nuesos representantes políticos, asina como pasa nel restu de territorios onde ye llingua propia. La oficialidá sigue siendo’l camín precisu pa poner en marcha un cambiu. Sicasí, pa Iniciativa pol Asturianu trabayar el campu internacional ye dende qu’entamamos el nuesu llabor, un trabayu imprescindible y al que pensamos que nun se pue renunciar. De mano porque la situación del asturianu nun ye única, y ye importante conocer la situación d’otres llingües en momentos asemeyaos del so procesu de normalización.
Del camín d’estos cinco años nes entidaes internacionales nes que participamos (ELEN y ALCEM) yá llegaron dellos frutos: Güei ye muncho más conocida la situación del asturianu n’otros movimientos de reivindicación llingüística europeos, tenemos rellaciones más fuertes con otres comunidaes llingüístiques minorizaes, pero sobre too, l’asturianu ta en tolos foros europeos en pie d’igualdá con otres llingües en situaciones de minorización, oficiales o non.
Esti cambiu reforció la conocencia de la situación del asturianu nel ámbitu estatal, onde la falta d’oficialidá fai tan difícil visibilizanos. Los movimientos reivindicativos d’otres llingües en meyor situación que la de nueso tiénenmos agora más en cuenta.
Pero si hai un llabor importante nesti camín ye’l d’abri-y a la llingua asturiana’l camín de les grandes instituciones internacionales. Gracies a la nuesa participación activa nestes entidaes europees, la llingua asturiana pudo reivindicase en foros como’l Parllamentu Européu o l’Altu Comisionáu de Drechos Humanos de la Organización de les Naciones Xuníes, ente otros.
Güei, magar que’l trabayu principal sigue siendo buscar soluciones a los problemes que tien l’asturianu equí, nos territorios onde ye llingua propia, les presiones esternes nel ámbitu internacional tienen cada vegada más ecu ya incomoden más a los gobiernos d’Asturies, Castiella y Lleón y España.
La última d’estes ferramientes ye’l Protocolu pa la Garantía de los Drechos Llingüísticos, del que participamos na so redacción y que vamos firmar esti sábadu en Donostia en representación de la comunidá asturfalante. Sedrá una ferramienta clave pal llabor reivindicativu y de normalización nos vinientes años, y l’asturianu tuvo’l so papel nesti campu. Aguardemos agora que los nuesos representantes políticos sepan acoyelu como un documentu que los ayude a faer meyor el so trabayu nel ámbitu de la normalización del idioma.


Fonte: Iniciativa pol Asturianu

No hay comentarios:

Publicar un comentario

Los comentarios tán pendientes de moderación. Espublizaránse lo primero dable.