Feten entama’l 12 Febreru y llega al Muséu Piñole con una programación peramañosa

  

    Feten crez en númberu de compañíes y adelántrase nel calendariu, al algamar un programa con setenta y siete compañíes, más de 170 funciones y un mecigayu escénicu que si davezu llegaba a Xixón en redol al 20 de febreru, nesta ocasión adelantrase al 12 pa enllargase hasta’l día17.

   Maxa, circu, musicales, danza, teatru de títeres, d’oxetos, nueves tecnoloxíes, cuentos clásicos y drames y comedies modernos danse cita nun programa que se distribúi plees cais de Xixón, el Teatru Xovellanos, l’Antiguu Institutu, los centros municipales, el colexu Xovellanos y nesta edición, per vegada primera, nel Muséu Nicanor Piñole.

  Ye la llegada de Feten al Piñole una de les novedaes d’esta convocatoria, que caltien el so cálter de buscar lo último pa los públicos más nuevos, dende neños a adolescentes, ensin escaecese de contentar a padres y güelos. Y por eso treslládase al muséu, porque ye’l llugar perfectu p’acoyer ‘Biblioteca de cuerdes y nuedos’, una propuesta escénica que tien tamién daqué d’instalación artística. De la mano de José Antonio Portillo Vesga, demientres 55 minutos, 35 neños van enfusase precisamente na biblioteca qu’anuncia’l títulu, nun espectáculu que busca fomentar la llectura.

  Once espectáculos van poder vese demientres esta nueva edición de la Feria Europea d’Artes Escéniques pa Neños y Neñes de Xixón per primer vegada. Procedentes d’Andalucía, Asturies, Cantabria, Castiella y Llión, Cataluña o Estremadura y Murcia, 11 compañíes van tener la oportunidá mientres FETEN de ver les primeres reacciones ante les sos respectives puestes n’escena.

  Tres compañíes, una castellana y lleonesa, otra estremeña y una postrera murciana, xúnense pa crear un espectáculu únicu. Va ser unu de los primeros estrenos absolutos de la Feria, el de ‘El llagu de los cisnes. La lleenda de la princesa cisne’ que, amás, va inaugurar de manera oficial la cita escénica en Xixón, el domingu 12 de febreru, a les 18.00 hores. Trátase de Morfeo Teatru, Karlik Dancia Teatru y Gloria Muñoz Artes Escéniques que van poner n’escena, nel Teatru Xovellanos, una nueva versión del clásicu que narra la hestoria del malváu bruxu, Rotbart que, en pidiendo a los Reis la mano de la so fía, la bella Odette, y estos refugá-yla, convierte a la princesa en cisne de día y muyer de nueche hasta que, al atopar un amor verdaderu, consiga romper el conxuru.

  Pela so parte, los trabayos de les compañíes andaluces Cía. la canela (‘La grana’) y Da. Te Dancia (‘Akari’) sumense al apartáu d’estrenos del cartelu de FETEN 2017. Les distintes maneres de crecer son el puntu de partida de ‘La grana’, un espectáculu sobre los primeros biltos, cómo les llendes ayuden a crecer, pero’l mieu non y cómo hai que regar tolos díes pa crecer. ‘Akari’, per otru llau, ye’l títulu que Da Te Dancia da a la so nueva producción. L’escenariu del Centru de Cultura Antiguu Institutu va recibir asina a toa una coreografía axilosa, risondera ya inquieta; allegre, murniu o enoxada…

   Les asturianes Fantastique Company y La Sorrisa del Llagartu van tomar el relevu con ‘El viaxe de Dorothy’ y ‘La Mona Simona’, respectivamente. Dorothy ye una nueva rapaza que vive colos sos tíos en Kansas que ye atrapada por un tornáu que la llevará a tierres estrañes gobernaes por un poderosu magu. Y de la versión anovada del clásicu de Oz a ‘La Mona Simona’, qu’espera ansiosa colgada de la caña d’un milenariu baobab l’amanecer pa ver nacer el sol. A tolos animales que s’averen, Simona convidarálos a ver el gran espectáculu.
Fonte: asturnews.com