Acabamos l'añu nel que RTPA tuvo celebrando una década d'existencia. Ensin
dulda, no que tien que ver col compromisu que marca la llei cola difusión de la
llingua propia, foron diez años con munches sombres y mui poques lluces. Con
too, nun vamos dir tan p'atrás; vamos quedar nos últimos 365 díes. Y ye qu'hai
poco más d'un añu viemos a un conseyeru d'Educación y Cultura afirmando que
RTPA diba dexar d'usar l'asturianu pa facer chancia. Tamién viemos a un
director xeneral de RTPA asegurando que yera partidariu del usu del nuestru
idioma nos medios públicos. Y viemos a una mayoría de la Xunta Xeneral
aprobando'l proyectu d'un plan de dignificación que falaba d'usar la radio y la
televisión públiques como ferramienta de normalización llingüística.
Sicasí, pasaron 365 díes y a pesar de los reportaxes trunfalistes sobre
tolo bono que supuestamente fixeron en TPA nestos últimos años, col usu del
nuestru idioma too sigue igual. L'asturianu namás val pa les pingarates, pa
da-y un toque de color y d'humor a una emisora que bien podría emitir dende
Madrid -por muncho que nos echen en cara que de vez en cuando van peles
caleyes, como si eso yá valiera pa xustificar la so existencia-. Asina, l'usu
de la toponimia oficial va p'atrás, nun aparecen programes d'entretenimientos
nuevos con un tratamientu dignu pa la cultura asturiana, l'idioma sigue
arrequexáu nos usos diglósicos ensin nengún procuru cola corrección y calidá,
la programación infantil n'asturianu emítese ensin promoción nos fines de
selmana -nuna canal onde l'espectador mediu tien más de 50 años-...
Nestes condiciones, la RTPA funciona como'l güertu priváu d'Antonio Virgili
y amigos, los que diseñen una programación con pocu o nengún interés, amás de
mui baxa calidá. A pesar de too esto, la oposición calla gracies a unos puestos
directivos nuevos a repartir a deu ente PSOE, PP y IX. ¿De qué valen les
promeses electorales énte la posibilidá de colocar a ún de los nuestros nel
conventu? Eso sí, pa llavar la cara echamos dalgún partíu o película
n'asturianu de manera residual y con muncha improvisación. Sicasí, parez
qu'a los asturianos esto nun-yos val.
Y ye que la TPA vuelve zarrar añu rexistrando mínimos históricos, mentes
que RPA parez nun existir pa la mayor parte de la ciudadanía. Los asturianos
-los pocos que vemos y sentimos RTPA- asistimosplasmaos a una televisión onde
l'usu del idioma ye, amás de marxinal, diglósicu, vulgar y centráu no
folclórico. Nel casu de la radio, l'asturianu aparez como pingarates a lo
llargo de la programación, mentes que la música nesti idioma parez nun existir.
¿Tien sentíu que paguemos una radio que ta pa poner lo mesmo que pue sonar en
Cadena Dial o Los 40?
Estos medios nun son más
qu'una ferramienta de sustitución llingüística y d'aculturación. El movimientu
de reivindicación llingüística siempre defendió la so existencia, pero nestes
condiciones, onde RTPA namás ta al serviciu de los caprichinos d'Antonio
Virgili y pa incumplir la llexislación vixente, ye'l momentu de facer un llamáu
a la sociedá asturiana pa que reflexone sobre si tien sentíu mantenelos, amás
de pagar la deuda xenerada polos sos xestores.
Fonte: XDLA
Tamos como antaño, siguimos como siempres con una TPA en castellán y con dalgún chisgo al telespectador n'asturianu. Nos colexos con clases d'asturianu pero ensin oficialidá: un cachondeo o meyor una tomadura de melota
ResponderEliminarSi continueu votant els mateixos polítics que van contra la vostra cultura i aquests polítics continuen votant uns pressupostos que permeten que una televisió tingui dèficit i vagi contra la vostra cultura, doncs continuareu tenint una llengua no oficial i una televisió que farà el mateix que Tele5 però amb l'agreujant que ho farà en la mateixa llengua que Tele5 i, a sobre, us costarà diners.
ResponderEliminarJa ho diuen. Si t'enganyen un cop, és culpa de qui t'enganya. Si t'enganyen dos cops, és culpa teva.
Totalmente ciertu, exisie una falta de voluntá y de compromisu per parte d'una parte importante de la población asturfalante que promete y proxecta munches coses nes sidreríes pero depués quédase sotechada en casa en llugar de reclamar lo suyo na cai.
ResponderEliminarSi, dellos -bastantes- creen que yá cumplen cola llingua y el pruyimientu d'oficialidá manifestándose una sola vegada al añu pola cai Uría d'Uviéu so la bandera d'Asturies camino del Campoamor y eso solo nun va a nengún sitiu.
ResponderEliminar