14/12/16

TPA va entamar a emitir partíos de fútbol n’asturianu de forma periódica


Esti domingu va producise la primer emisión d’un partíu de fútbol n’asturianu en TPA. Va ser el Lealtad-Coruxo de Segunda División B, choque que van comentar Miguel Fernandi y Nacio González y que va ser el primeru de munchos, yá que la intención de la direición xeneral del ente ye la de retresmitir al menos un alcuentru al mes.
El partíu programáu al meudía en Les Caleyes va pasar a la historia por ser el primeru que la televisión pública va emitir en llingua asturiana nos sos diez años de vida. Fernandi va ser l’encargáu de llevar el pesu de la retresmisión col acompañamientu nos comentarios de González, col que yá coincidiera en Radio Sele nos partíos del Uviéu.
“Ye un acontecimientu más que simbólicu, yá que la idea ye la de facer al menos un partíu al mes del Lealtad y del Caudal”, esto ye, los dos equipos del país que militen en Segunda División B, esplica Fernandi, que nun descarta que tamién se pudiera emitir n’asturianu dalgún de Tercera División, dependiente d’otra productora. Nesi sen, nun se pueden sumar a esta iniciativa los alcuentros del Sporting y l’Uviéu pol fechu de que RTPA nun tien los derechos de retresmisión de la LFP.
40 años de retrasu
La direición xeneral de RTPA y la Direición Xeneral de Planificación Llingüística y Normalización son les impulsores d’esta iniciativa, pa lo que confiaron nel llabor de Fernandi, trabayador de la radio pública, que debuta asina nuna retresmisión televisiva. “Toi mui contentu por tener esta oportunidá histórica”, destaca’l lluanquín, qu’afirma que’l fechu de que se pueda ver na TPA un partíu de fútbol n’asturianu “ye un pasu mui importante pa la normalización del idioma, como sería tamién informativu”, anque apunta “que vien con 40 años de retrasu”, comparándolo coles emisiones en llingua propia de les otres autonómiques.
El partíu ente’l Lealtad y el Coruxo va disputase a les 12 hores del domingu. El conxuntu maliayu vien cargáu de moral tres la victoria por 2-3 col Somozas, partíu que-y valió p’asentase nuna cómoda décima posición, a cinco puntos de los puestos de peligru. Un trunfu énte’l conxuntu gallegu en Les Caleyes serviría a los de Roberto Aguirre p’alcanzar na tabla al Coruxo, que suma 25 puntos, y roblar asina una gran primer vuelta.
Fonte: asturies.com

6 comentarios:

  1. Fernandi apunta bien “que vien con 40 años de retrasu”, comparándolo coles emisiones en llingua propia de les otres autonómiques.

    ResponderEliminar
  2. Toi totalmente acordies con Fernandi y con Serantes; pero lo que cunta ye lo que venga d'equí p'arriba yá y pa eso tamos totalmente a tiempu y amás va depender de nós mesmos.

    ResponderEliminar
  3. Pa progresar nesti sentíu, igual que pa llograr la oficialidá de la llingua asturiana, ta demostráu que sobra la bona educación, les suxerencies, los pidimientos y manifiestos formales y oficiosos, según les bones y académiques palabres. Hai que "convencer" de la manera qu'entienden los nuesos ínclitos polítidos, hai qu'emburriar, meter enforma ruiu y emburriar con muncha frecuencia... si ye qu'interesa llogralo, claro, qu'esa ye otra.

    ResponderEliminar
  4. O sigui, la "normalitat" serà un partit de Segona B o Tercera al mes.

    Els partits importants, contra el Barça, el Madrid o qualsevol que sigui de Segona A en amunt, en castellà. "Para que lo entienda todo el mundo."

    I suposo que, a sobre, serà en horari matinal, oi? Clar, després demostraran que el futbol en asturià no té audiència.

    Mentre no feu com diu en Fonte Bermeya, no fareu res de bo.

    Nota: a Catalunya Ràdio i, posteriorment, TV3 es retransmeten absolutament tots els partits de tots els esports en català des del primer dia. Segurament és perquè som poc simpàtics.

    ResponderEliminar
  5. Hai que lluchar enforma n'Asturies, pero lluchar ye lluchar, pa llegar a llograr eso.

    ResponderEliminar

Los comentarios tán pendientes de moderación. Espublizaránse lo primero dable.