La diputada Lucía Montejo presentó’l paquete d’enmiendes de Podemos Asturies a los presupuestos nel sector cultural. Nél demanda una partida de 90.000 euros pal apoyu y promoción del cine en llingua asturiana, dalgo que la parllamentaria considera “fundamental pa la normalización” del idioma.
Les seis enmiendes parciales a los presupuestos nel sector cultural que presenta Podemos Asturies van aldericarase mañana na Xunta Xeneral –xunto coles otres enmiendes presentaes por tolos grupos de la oposición– tán destinaes “a ameyorar la eficiencia na xestión de los recursos, apostando, sobre manera, por aquelles necesidaes más urxentes” en beneficiu de “artistes, la creación audiovisual y les empreses culturales asturianes”, apunten dende la formación morada. Ente ellos destaca’l pidimientu d’un partida de 90.000 al apoyu y promoción del cine en llingua asturiana, amás d’otra de 60.000 euros pa beques p’artistes que, en dambos casos, retrayeríense de la partida destinada a reuniones y conferencies. “Detectamos dellos casos de xestión mui deficiente de los recursos nel ámbitu de la cultura y por eso apostamos por redistribuyilos y destinalos ónde se necesiten”, afirmó Montejo.
Otru aspeutu nel que calca la diputada ye’l cumplimientu del 1 por cientu cultural, una midida que contemplaba l’artículu 99 de la Llei de Patrimoniu Cultural d’Asturies, suspendíu dende’l 2013. Montejo esplicó que l’oxetivu de la enmienda ye “recuperar una parte importante de la financiación al traviés de fondos públicos pal sector cultural, ún de los más castigaos pola crisis”.
En cuanto a la industria audiovisual, la diputada afondó nel casu “especialmente sangrín” de la RTPA, “una empresa pública con menos de 140 trabayadores na que, coles incorporaciones nueves, cuenta con nueve direutivos y casi cuarenta puestos intermedios”. Podemos Asturies apuesta por racionalizar los fondos que se destinen al ente públicu de comunicación “cola reducción equivalente al salariu de los trés direutivos nuevos nomaos a deu –159.140 euros–, condicionando cualquier incrementu futuru nel presupuestu a un recorte nel gastu en direutivos”.
Esta cantidad destinaríase a fortalecer el texíu audiovisual asturianu, aportando los fondos a premios, beques y actividaes culturales pa mozos creadores, asina como a ayudes a la realización d’actividaes y obres audiovisuales con perspeutiva de xéneru.
“La cultura nun ye fartura”
En referencia a la Fundación Princesa y la promoción cultural del país, Podemos Asturies propón l’adecuación de la subvención pa sufragar los gastos de caráuter cultural dafechu, eliminando aquellos destinaos al despilfarru de fondos públicos de cultura. “La cultura nun ye fartura. El dineru de les fartures vamos destinalo a fortalecer les ayudas a les pymes culturales asturianes, que son les verdaderes dinamizadores del sector cultural nel nuesu territoriu”.
Por último, la formación morada prentende una partida de más de 7.000 euros pa la democratización de la ópera. Asina propón la creación de tickets a precios asequibles pa estudiantes universitarios cola fin de que puedan disfutar d’esti xéneru.
Semeya obra d'Iván G. Fernández.
Fonte: Asturies.com
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.