Partidarios de la oficialidá del asturianu percuerren el centru d'Uviéu reclamando la reconocencia de la llingua asturiana

Partidarios de la oficialidá de la llingua asturiana percorrieron esti vienres les cais del centru d'Uviéu pa reclamar esta reconocencia, como tolos años nel Día de Les Lletres Asturianes. La marcha, lliderada por un grupu de gaiteros y percusionistes, entamó ante la Estación de Renfe d'Uviéu y percorrió tola cai Uría hasta acabar frente al Teatru Campoamor, onde ta previsto l'actu institucional de l'Academia de la Llingua. Sindicatos Suatea, CCOO, UXT y CSI, organizaciones polítiques como Compromisu, Conceyu Abiertu, Andecha Astur, Izquierda Xunida, y delles asociaciones sociales y culturales diéronse cita y aportaron les sos pancartes a la reivindicación. Esti añu destacó la presencia de Reciella, asociación que promueve aiciones educatives y formatives n'asturianu pa los más pequeños. Un grupu de padres colos sos respeutivos fíos en carricoches desfiló tres la pancarta del coleutivu. Col grupu d'Izquierda Xunida d'Asturies, tuvieron delles cares conocíes de la política asturiana, tales como'l so coordinador xeneral, Manuel González Orviz, el so senador Jesús Iglesias, la so diputada Noemí Martín, o los sos conceyales Roberto Sáchez Ramos y Alejandro Suárez (Conceyu d'Uviéu) y Jorge Espina (Conceyu de Xixón). Tamién tuvo'l presidente de la Comisión d'Economía de Foru Asturies, Inaciu Iglesias. Fonte: Europa Press