Avilés acueye hasta'l domingu la II Feria del Llibru y Discu n’Asturianu

por Pablo R. Guardado

La Pescadería Municipal Antigua d’Avilés repite como escenariu de la II Feria del Llibru y Discu n’Asturianu, que va tar abierta hasta’l domingu a les 19 hores. Los visitantes van poder escoyer ente más de 500 títulos y alredor de 60 discos.

 

“El sitiu propúnxolo la direutora xeneral de Política Llingüística l’añu pasáu y ye too un aciertu, yá que ye un llugar de pasu con muncha lluminosidá”, esplicó Román Antonio Álvarez, conceyal d’Educación y Cultura, sobre esti recintu que coneuta al traviés d’una pasarela col Centru Niemeyer. Y lo cierto ye que, en pallabres de Luis Martín, presidente de l’Asociación de Llibreríes del Principáu d’Asturies, la edición primera d’esta iniciativa foi too un ésitu, lo qu’anima a caltener, amás del emplazamientu, el modelu de caxa única ente les llibreríes que xestionen l’espaciu, les avilesines Casona, Balmes y Noveno Arte.

 

Dambos acompañaron a Ana Fueyo na inauguración de la Feria, celebrada na tarde d’ayeri, anque ésta yá taba abierta dende la mañana, y na presentación de la obra conmemorativa de la XXXV Selmana de les Lletres Asturianes, de nome ‘Dibuxando un camín’. La direutora de Política Llingüística destacó que ye “un esfuerciu y una apuesta perimportante’l convocar y cantener esta segunda Feria del Llibru y del Discu n’Asturianu nel oxetivu de la conseyería de normalizar y visualizar la llingua asturiana y el gallego-asturiano”. Fueyo emponderó la “bayura y la calidá de la lliteratura y la música fecha n’asturianu, que de xuru a más d’ún va a sorprende-y”.

 

Sobre’l llibru conmemorativu ‘Dibuxando un camín’, señaló que se trata d’una obra con cuatro histories “feches dafechu y n’esclusividá pa esti eventu” polos cuatro ganadores del Premiu Alfonso Iglesias –Ruma Barbero, Isaac Rivero, Javier Antonio Marinas y Alfonso Zapico–, lo que-y añade “inda más valor”. Amás, apuntó que “per primer vegada atopa los dos rexistros llingüísticos que tenemos nel Principáu d’Asturies, la llingua asturiana y el gallego-asturiano”. En total, la conseyería editó 2.500 exemplares n’asturianu y 500 en fala.

 

Pela so parte, Martín espresó “la satisfaición” de los llibreros “por tar nesti camín”, en referencia al lema de la Selmana de les Lletres, y esplicó que la feria que xestiona’l coleutivu que preside “tien la finalidá de sacar a la cai la cultura asturiana p’axitala”. Álvarez, mentes, escusó l’ausencia nel actu de l’alcaldesa, Pilar Valera, y destacó la importancia de “poner en valor la nuesa cultura”.

 

Cuentacuentos, talleres y presentaciones

 

Dende ayeri, día nel qu’abrió les sos puertes la feria, hasta’l domingu, l’Antigua Pescadería Municipal avilesina va acoyer delles actividaes, como cuentacuentos, talleres y presentaciones. Asina, llectores y aficionaos a la música van poder conocer de boca del so autor los detalles de trabayos como ‘Misión Pelayo’, ‘Tatuaxes nel corazón’, ‘El misterio de les histories que s’escribíen soles’ o ‘Fame d’amor, determín de pasión’, amás del discu ‘A terra esqueicida’, de Mestura, o del númberu 12 de la revista ‘Formientu’. Pa más detalles y horarios, pue consultar la nuesa seición ‘Convocatories’ dientro de les anuncies de la Selmana de les Lletres Asturianes.

Fonte: Asturies.com