Normalidá y oficialidá pal asturianu

- María Liliana García Díaz (Xixón) Miles d’asturianos llevamos años glayando peles cais d’Uviéu l’asturianu llingua oficial; un pidimientu xustu y democráticu que se vien repitiendo col festexu de les nueses lletres tolos meses de mayu. Falamos de persones y falamos de drechos. Cada vuelta somos más los qu’apostamos pola normalización social del asturianu y pola cooficialidá en planu d’igualdá col castellán, ensin discriminaciones nin imposiciones; de tala mena qu’al que-y pete pueda vivir llibremente n’asturianu nesta nuesa Asturies patria querida. Por qué esi negase a oficializar la llingua llariega d’Asturies. Por qué caltener esta situación predemocráctica y d’escepción. Quién tien miéu a esta llingua siempres maltratada que nun-y lu tien al restu de llingües españoles que son toes cooficiales nos sos territorios, esceuto l’asturianu. N’Asturies nun hai conflictu llingüísticu si los falantes d'asturianu son mudos o tan callaos baxo la bota de la intolerancia, los prexuicios y les paranoies d’unos cuantos dirigentes que quieren imponenos los sos mieos y pa encima cuenten ellos que son demócrates y lliberales. L’asturianu ye un patrimoniu llingüísticu de primer orde y únicu nel mundu, una llingua nin meyor nin peor qu’otres, y que sirve pa comunicanos y falar colos nuesos fíos, amigos y resto de ciudadanos de cualaquier tema. Una llingua viva que quier vivir con dignidá otros milenta años más, pero que dellos s’empeñen incomprensiblemente en arrequexar y marxinar hasta que muerra seliquino y callandino como la pariente probe que s’escuende de les visites. Lali García, Xixón Fonte: La Nueva España