Llega una edición nueva de TRADIS, iniciativa que busca dignificar la música tradicional asturiana

   Esti sábadu, na Casa Cultura de La Pola Llaviana, va celebrase la edición 2014 de TRADIS. El Grupo AMansalva, que presenta un cartelu espectacular, busca con esta iniciativa dignificar l'entamu d’eventos venceyaos a la música tradicional del país.

Música tradicional asturiana

   Tres l’ésitu de TRADIS 2013, que se diseñó como un espectáculu d’humor y música tradicional que percorrió dellos conceyos del país nel mes d’avientu, la organización decidió da-y continuidá con una xornada única más enfocada a lo musical y una partipación cuantitativa más importante d’artistes. Asina, escoyóse la Casa Cultura de La Pola Llaviana pal eventu y el sábadu, a les 19 hores, como fecha. “El primer oxetivu ye dignificar la organización d’esti tipu d’eventos”, esplica Pablo Carrera, gaiteru y responsable d’AMansalva, compañía qu’entama esta actividá de manera profesional, con medios téunicos y una propuesta diferente, lo qu’obliga a cobrar entrada, dalgo que nun afeuta a la participación de públicu. De fechu, queden poques entraes nel CIDAN, onde se venden de manera anticipada por 6 euros. “Ye una suerte nestos tiempos que cuerren esta respuesta de la xente, yá que na música tradicional nun se suel dir a taquilla”, añade.

   Esta demanda importante d’entraes débese ensin dulda al cartelu espectacular de TRADIS 2014. Nomes como Mari Luz Cristóbal, Omar Martínez, Marisa Valle Roso, Thalía Noriega y El Che de Cabaños van xuntase sobre l’escenariu con músicos de la talla de Lisardo Prieto (violín), David Varela (acordión), Xuacu Amieva (gaita y bandurria), Estefanía Moro y Luis Ángel Fernández (pandereta) y el propiu Carrera (gaita). “La idea ye dar un aire diferente a los cantares de tradición asturiana. Éstos suelen dir siempre acompañaos de la gaita, pero nós pretendemos incorporar tamién otros instrumentos tradicionales amás de la propia gaita, que tamién va tener espaciu en TRADIS”, comenta Carrera. La propuesta d’esti espectáculu, que va poder vese nel espaciu ‘Sones’ de TPA en xunu, complétase con una pareya de baille formada por Moro y Fernández, y una actuación d’humor protagonizada por ‘Más que dos’.

   Ensin dulda, una actividá que da un saltu con respeuto al TRADIS 2013 y que, vista la respuesta del públicu, pretende siguir medrando n’años próximos. “Una posibilidá ye ampliar más l’abanicu y traer músiques de toda Europa pa fusionales cola asturiana”, valora’l llavianés. De momento, toca disfrutar esti sábadu de la edición del 2014.     Fonte:  Asturies.com