Foru afita’l so compromisu pa col asturianu como patrimoniu cultural

Pablo R. Guardado La Comisión de Cultura de Foro convidó’l llunes a dellos coleutivos asturianistes a una conferencia de nome ‘Cultura Asturiana y Patrimoniu Llingüísiticu’. Nella, el senador Martínez Oblanca afitó’l compromisu del partíu pa col asturianu. Xunto col representante de Foro (por designación de la Xunta Xeneral) na Cámara Alta, participaron tamién nel actu celebráu nel xixonés Centru Municipal Integráu d’El Coto, Xosé Nel Riesgo, direutor de la Fundación Municipal de Cultura, Educación y Universidá Popular de Xixón; Alfredo Ignacio Álvarez Menéndez, ex direutor xeneral de Política Llingüística; Inaciu Iglesias, presidente de la Comisión d’Economía de Foro; y Emilio Marcos Vallaure, presidente de la Comisión de Cultura y ex conseyeru de Cultura y Deporte. L’eventu foi una continuidá del celebráu hai dos años nel CMI d’El Llano y tien como oxetivu amosar los compromisos de la formación política a los coleutivos asturianistes y sentir los esmolecimientos d’éstos nun alderique posterior, nesta ocasión centrándose nel ámbitu européu por mor de la cercanía de les eleiciones. El primeru en garrar la pallabra foi Riesgo, qu’analizó la política llingüística de Xixón y anunció la convocatoria próxima d’una plaza pa la Oficina de Normalización Llingüística cola fin d’asegurar la continuidá de la mesma, yá qu’hasta la fecha’l puestu ye de llibre designación y depende de la voluntá del gobiernu de turnu. D’igual forma, destacó’l bon ambiente de trabayu dientro de Foro, onde “naide me diz lo que tengo que facer. Per primer vegada na mio vida, déxenme trabayar”. Pela so parte, Álvarez Menéndez afirmó que “Europa interésanos muncho dende’l puntu de vista de recuperación del asturianu” al significar un marcu onde la reivindicación del idioma converxe con otres llingües minoritaries. Nesti puntu, faló del Programa Europa Creativa, destináu a puxar los sectores culturales y creativos, qu’Asturies nun aprovecha. Iglesias, con ayuda de recortes de prensa del desapaecíu selmanariu ‘Les Noticies’, fixo un repás a declaraciones de políticos d’otres formaciones, como PSOE, PP y IX, “que faen promeses que nun cumplen”, y recordó la propuesta de Francisco Álvarez-Cascos nel añu 1998, cuando taba sobre la mesa la reforma del Estatutu d’Autonomía, de negociar una oficialidá diferida, dalgo que los socialistes refugaron dafechu. Nestos 15 años los avances del idioma dexáronse ver poco, pero “nun hai tantu tiempu nun había nin promeses” y, nel casu concretu de Foro, “dimos un pasu más que tovía nun rescampla, con coses distintes”. Asina, destacó que la intención de la formación asturiana ye la de sacar a la llingua de la llucha partidista y ser proactivos, llamando a la sociedá a poner de la so parte. Ente esos avances significó’l fechu de que dientro de Foro l’asturianu nun ye polémicu, “tolo contrario”, y que tolos responsables tienen bien nidio que “forma parte del nuesu patrimoniu, al igual que’l monasteriu de San Salvador de Curniana”. Pa comprobalo, señaló, namái fai falta acudir a los testos fundacionales del partíu, con “una política de mínimos impecable”. Sicasí, apuntó que “lo usamos poco en declaraciones públiques”, afalando a Isidro Martínez Oblanca, como responable de campaña de les Europees, a incorporalu nos actos y materiales, faciendo énfasis tamién na toponimia. Por último, Iglesias argumentó los motivos polos que “mirar pol asturianu ye evidentemente rentable económicamente”, cola posibilidá de recibir financiación estatal y europea pal idioma. “Lo que pasa col patrimoniu asturianu ye antidemocrático” Vallaure, na so intervención, fixo una crítica de la política cultural fecha polos gobiernos asturianos, “a esceición de los nuesos 11 meses”, y afirmó que “lo que pasa col patrimoniu asturianu ye antidemocrático”. L’ex conseyeru nun tien dulda en calificar la llingua como “patrimoniu, que ye tolo que nos dexaron los nuesos antepasaos”. En concreto, apuntó que “la llingua asturiana ye la llingua del pueblu, que foi’l que la caltuvo” pese a que la burguesía “abandonóla nel sieglu XX”, y señaló que’l “día que muerra’l falante caberu d’asturianu, cai Santullano”. Darréua puntó que lo que-y pasa a tol patrimoniu cultural asturianu ye frutu de la “inorancia” y punxo dellos exemplos de situaciones que vivió mientres el so pasu pola conseyería: “Patrimoniu paez que ye lo que namáis faen ellos, como’l Niemeyer”. Pa zarrar l’actu, enantes de dar pasu a un alderique breve, Martínez Oblanca esplicó que “como asturianu, siempre creí que tenía la obligación de conservar lo de nueso, aquello que nos identifica”, y recordó cuando nel 2001, na so otra etapa como senador, recibió a Ramón d’Andrés y a Xicu Xabel Díaz Yepes, que naguaben por echar a andar la Fundación Caveda y Nava, organización “que buscaba un consensu pal asturianu fuera de la llucha partidista”. El responsable de campaña amosó’l so compromisu pa col idioma y apuntó que’l motivu principal p’abordar la reforma próxima del Estatutu d’Autonomía “ha de ser dar la oficialidá al asturianu. Si non, piérdesenos”. “Pasa’l tiempu y vamos p’atrás”, continuó’l senador, que ratificó que “nun hai polémica col asturianu dientro de Foro, lo que demostramos con fechos nel 2011, con asturianistes en puestos de responsabilidá”. Tamién destacó’l so papel na Cámara Alta, cola presentación d’enmiendes a los Presupuestos Xeneral pa da-y una dotación económica a l’Academia de la Llingua Asturiana, y la so disposición a sentir los pidimientos de coleutivos en defensa de la nuesa cultura. Por último, apuntó que Foro quier ser “la voz d’Asturies n’España y n’Europa” y que la so presencia nes instituciones permitirá defender iniciatives beneficioses pa la cultura asturiana que “nunca serán propuesta nin defendíes pol PSOE y el PP”. Na semeya, Riesgo, Iglesias, Martínez Oblanca, Vallaure y Álvarez Menéndez. Fonte: Asturies.com