27/5/14

L'Academia celebra'l sábadu la prueba de conocencia de mayu

    Esti xueves ye’l día caberu pa formalizar la matrícula pa la prueba de conocencia de mayu de l'ALLA, que ve tener llugar esti sábadu na Escuela d’Inxeniería Informática. Otra manera, yá ta abiertu’l plazu d’inscripción pa la UABRA..

    “L'Academia de la Llingua Asturiana, sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu”, ta acabante d’abrir la matrícula del segundu de los dos esámenes que celebra tolos años –el primeru ye en xineru–, que sirve pa que les persones interesaes puedan algamar el documentu qu’afita la so conocencia d’asturianu nel nivel 1 o básicu. Pa ello han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu.

    L’esame cuenta con dos partes, escrita y oral. La primera va principiar con un dictáu, pa continuar con una torna, una serie d’exercicios gramaticales y una redaición. Darréu, l’aspirante a algamar el títulu de conocencia pasará a otra sala u caltendrá una conversación breve con dalguna persona del xuráu que valorará’l so dominiu oral del idioma. Les persones interesaes en facer la prueba de conocencia tienen de plazu hasta’l xueves día 29 pa formalizar la matrícula na sede de la institución (L’Águila 10, Uviéu) nel horariu siguiente: de 9 a 15 hores y de 16 a 19 hores. L’esame va celebrase’l sábadu 31, a les 9.30 hores, na Escuela d’Inxeniería Informática de la Universidá d’Uviéu (cai Valdés Sala), nel campus uviedín de Los Catalanes.

La UABRA, del 28 de xunetu al 8 d’agostu
    Ayeri quedó abiertu’l plazu d’inscripción pa la quinta edición de la Universidá Asturiana de Branu (UABRA), que cuenta cola collaboración de la Universidá d’Uviéu y el Conceyu de Cangas del Narcea, en cualesquier de los cursos qu’ufierta. Los dos más clásicos, el ‘Cursu Elemental de Llingua Asturiana’ y el ‘Cursu Avanzáu de Llingua Asturiana’, tienen un coste de 300 euros, cantidá qu’inclúi los materiales y la pensión completa na Escuela-Hogar de Cangas, mentes que’l del ‘Cursu de Gallego-asturiano (segunda fase)’, d’una selmana (del 28 de xunetu al 2 d’agostu), ye de 190 euros.

    Como n’años anteriores, la ufierta educativa complétase colos ‘Cursos d’Afondamientu Cultural y Llingüísticu’, de 35 llectives, a los qu’hai que sumar nesta edición dellos cursos en collaboración cola Universidá d’Uviéu. Asina, los primeros tán destinaos, fundamentalmente, pa maestros o llicenciaos, y divídense en dos per cada selmana. Na primera, los alumnos y alumnes podrán escoyer ente ‘Capacitación pa la Traducción al Asturianu’, impartíu pola académica nueva Cristina Valdés Rodríguez, y ‘Internet como recursu educativu’, coordináu por David Melendi. Mentes, na segunda tanda pue escoyese ente ‘Ecoloxía y Medioambiente n’Asturies’, dirixíu por Carlos Lastra, y ‘Cantares, bailles ya instrumentos musicales asturianos’, a cargu de José Antonio Gómez. Cáun d’estos cursos tien un preciu de 190 euros, tamién con pensión completa y materiales incluyíos.

    Otra manera, los que s’entamen en collaboración cola Universidá d’Uviéu tien como destinatarios a estudiantes de carreres universitaries, que recibirán ente 4,5 y 6 creitos de llibre configuración por participar nellos. La ufierta nesta estaya ye la siguiente: ‘Cursu Elemental de Llingua Asturiana’, ‘Cursu Avanzáu de Llingua Asturiana’, ‘Capacitación pa la Traducción al Asturianu’, ‘Internet como recursu educativu’, ‘Ecoloxía y Medioambiente n’Asturies’ y ‘Cantares, bailles ya instrumentos musicales asturianos’.

    El día caberu pa formalizar la inscripción pa la UABRA ye’l vienres 6 de xunu, siendo l’horariu pa formalizar la matrícula na sede de l’ALLA (L’Águila 10, Uviéu) el siguiente: de llunes a xueves, de 9 a 15 hores y de 16 a 19 hores; y de 9 a 14 hores, los vienres. Por mor de la demanda alta que tienen estos cursos, la institución va siguir un orde rigurosu d’inscripción.  Fonte: Asturies.com

3 comentarios:

  1. Pal amigu Mario: ocasiones hailes asgaya, como ésta, ensin dir más allá.

    ResponderEliminar
  2. La formación ye un puntal bien importante.

    ResponderEliminar

Los comentarios tán pendientes de moderación. Espublizaránse lo primero dable.