Xosé Bolado ye'l gallardonáu col VIII Premiu Timón pa escritores en llingua asturiana o n'eonaviego, convocáu pola Asociación Cultural L'Arribada, según alcuerdu d'un xuráu integráu por Aurora García Rivas, Alberto Álvarez Peña, Miguel Rojo y Lluis Portal Hevia, y presidíu por Humberto Gonzali, que falló'l premiu esto lunes 19 de mayu. El Premiu Timón quier distinguir la trayectoria lliteraria de los escritores en llingua asturiana y n'eonaviego Pa esta edición optaben a los gallardones los/es escritores que nacieren nel añu 1.964 o antes.
Xosé Bolado nació n’Uviéu en 1946. Académicu de la Llingua, profesor de lliteratura y estudiosu de la lliteratura asturiana y poeta, ye autor de la Antoloxía poética del Surdimientu (1989). Como antólogu y críticu lliterariu ye autor tamién del prólogu, les notes y la bibliografía de "Escritores en Llingua asturiana" (1992), de la colección "Grandes autores asturianos" de la editorial Hércules-Astur, de dos llibros de Rosario Acuña y del fascículu "Lliteratura asturiana contemporania"' de la Historia de Asturias de La Nueva España. Tien publicaos diversos trabayos y artículos sobre l’actual panorama de les lletres asturianes. Publicó tamién los siguientes llibros de poesía n'asturianu; Conxura contra la decadencia (Llibros del Pexe, 2002), Na estación de los relevos (Llibros del Pexe, 2006) y La bona Intención (en formatu billingüe, Impronta Editorial, 2012),
Fue presidente del Atenéu Obreru de Xixón, onde fundó la colección poética Deva, y primer director de la revista creativa de l’Academia de la Llingua Lliteratura. Los ganadores anteriores del Premiu Timón fueron, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012) y Miguel Rojo (2013).
Esti gallardón, consistente nuna obra del escultor y ceramista xixonés Jesus Castañón, entregaráse’l 27 de setiembre mientres la cellebración de La Vagamar 2014.
Fonte: Asturnews
Con esti premiu reconoz toa una meritoria llabor lliteraria de munchos años, norabona.
ResponderEliminarEl VIII Premio Timón constitúi una clara reconocencia, anque bien tardíu, al méritu y al gran llabor del poeta y profesor don Xosé Bolado; vale más tarde que nunca. Felicidaes.
ResponderEliminarNorabona al profesor y al poeta n'asturianu.
ResponderEliminarFelicidaes al mio mayestru.
ResponderEliminarVa años dirixióme nun cursu de cinefórum pal profesoráu nel Institutu Calderón de la Barca de Xixón titulao "Cine y Muyer" del que guardo bien prestosa alcordanza como perbón mayestru.
ResponderEliminarCorrixióme delles pruebes de poesía n'asturianu de forma desinteresada, gracies mayestru.
ResponderEliminarSalú, muncha salú.
ResponderEliminarSalú y creación lliteraria.
ResponderEliminar