El PP vota en contra de la propuesta d’igua de la definición del términu ‘asturiano’ nel DRAE

por Pablo R. Guardado

Una proposición non de llei d’Izquierda Xunida (IX) sobre’l cambiu de definición del términu ‘asturiano’, ente otros, nel diccionariu de la RAE pa que s’axuste a la realidá, foi valtada pol Partido Popular (PP). El diputáu de Foro Enrique Álvarez Sostres votó a favor d’iguar la situación.

Esta demanda vieya, que movió nel 2012 Iniciativa pol Asturianu ensin ésitu pese a que la Real Academia Española (RAE) se comprometiera a estudiar la propuesta, recuperóla IX col rexistru d’una proposición non de llei firmada por Gaspar Llamazares na qu’encamentaba al Gobiernu estatal a que, “en cumplimientu del mandatu constitucional de respetu y protección de les llingües españoles, solicite a l'Academia qu'estudie cuatro modificaciones nes entraes del diccionariu, referíes a la llingua asturiana”. Estos términos son ‘asturiano’, ‘bable’, ‘asturleonés’ y ‘leonés’.

La votación de la mesma fíxose’l miércoles na Comisión de Cultura del Congresu y contó col votu favoratible de Foro, pero la negativa del PP impidió que saliera alantre. Álvarez Sostres fixo una defensa de la llingua asturiana na so intervención y apuntó que “bable y asturianu funcionen yá como sinónimos. Llingüísticamente ye absurdo siguir calteniendo que’l bable, esto ye, l’asturianu, ye un dialeutu. Lo ye del llatín, nidio, como toles llingües romances, pero non del castellanu como se dexa ver na acepción del DRAE”.

Perres asturianes pa la RAE

Iniciativa pol Asturianu llamenta “fondamente que'l Partíu Popular volviera a torgar l'aprobación d'una propuesta positiva pal asturianu nel Congresu, como yá fizo dos años siguíos cola nuesa propuesta pa dotar a l'Academia de la Llingua Asturiana de presupuestu estatal”, y recuerda que los pequeños cambios que realizó la RAE na edición última del so diccionariu nun iguaron la situación. “‘Bable’ pasó de definise como ‘Dialecto de los asturianos’ a ‘Perteneciente o relativo al asturiano o a los bables’ y como ‘Variedad actual del asturleonés’, ensin dexar nidia la so categoría de llingua. Na entrada ‘asturiano’ qu'enantes nun tenía nenguna aceición dedicada a la cuestión llingüística, agora la cuarta recueye ‘Variedad actual del asturleonés que se habla en Asturias’. El casu más grave dase na definición del términu ‘asturleonés’ que da por muerta a la llingua, al definila como ‘Dialecto romance que se hablaba en Asturias y en el antiguo reino de León’, casu asemeyáu al de la definición de ‘leonés’”, esplica.

Dada la situación, esti coleutivu demanda a la Xunta Xeneral “que tome midíes contra esti agraviu provocáu pola Real Academia Española”. Asina, pide que se retiren de los Presupuestos la partida destinada pa la Fundación Pro Real Academia Española, una aportación económica que namái da, amás d’Asturies, Murcia y Cantabria. “Somos la única comunidá con academia que nun recibe perres y la única de toes elles que dedica parte del so presupuestu a financiar a la RAE. A la vista de la falta de respetu y reconocencia de la RAE pa col asturianu, paezmos que ye'l momentu de retirar esta partida en favor de la infrafinanciada Academia de la Llingua Asturiana”, esixe Iniciativa pol Asturianu.

Fonte: Asturies.com

Foru defende la obligatoriedá de la materia de Llingua Asturiana en Primaria

por Pablo R. Guardado

Manuel Peña, diputáu y voceru d'Educación de Foru, aseguró que’l so partíu sofita “que la llingua y cultura asturiana sía obligatoria en Primaria, pa da-y el status que merez”. Demanda a Javier Fernández que, amás del idioma maternu, garantice tamién l’enseñu de dos llingües estranxeres.

“La polémica surdida poles decisiones del Gobiernu central del PP y del Gobiernu rexonal del PSOE ye gratuita y pon de manifiestu una vegada más que nin Rajoy en Madrid nin Fernández n’Asturies tienen el menor compromisu cola educación de los españoles y de los asturianos”, manifestó esta mañana Peña por mor de les quexes del PP a la decisión de la Conseyería d’Educación, Cultura y Deporte, cola entrada de la LOMCE, d’ufrir les asignatures de Llingua Asturiana y Gallego-asturiano –nel so ámbitu– en Primaria como materia de llibre configuración, cola alternativa de Cultura Asturiana, y refugar la inclusión d’una segunda llingua estranxera –por falta de perres, argumentó la conseyera Ana González–. “La XE tien como oxetivu que cada ciudadanu de los estaos miembros pueda falar dos idiomes amás de la so llingua materna. Pa contribuyir a esi oxetivu, Foru presentó una enmienda a la LOMCE pa que la segunda llingua estranxera tuviera’l carauter d’obligatoria na educación primaria. El PP de Rajoy refugóla, dexando llibertá a les comunidaes autónomes pa que la incluyeran o non nes sos planes d’estudios”.

Nesi sen, Peña apuntó que Mercedes Fernández, “nel marcu del desquicie que vive’l PP” asturianu, desautorizó a Génova “al pidir la segunda llingua estranxera y, agora, invéntase una confrontación col asturianu pa dividir a la ciudadanía”, amás de recorda-y al presidente del país que “debe respetar l’ oxetivu marcáu pola propia XE de garantizar l’enseñu de dos llingües estranxeras amás de la materna”. “Dende Foru apoyamos igualmente que la llingua y cultura asturiana sía obligatoria en Primaria, pa da-y l’estatus que merez, por ello somos favoratibles a la midida y esiximos a Javier Fernández que garantice l‘asturianu y dos llingües estranxeres nes escueles y colexos del Principáu”, continuó’l diputáu na Xunta Xeneral y voceru d’Educación de Foro nuna defensa del plurillingüismu al entender que “contribúi al desarrollu personal y a reforciar la ciudadanía europea al tiempu que proporciona meyores oportunidades profesionales”.

Fonte: Asturies.com

Foru afita’l so compromisu pa col asturianu como patrimoniu cultural

Pablo R. Guardado La Comisión de Cultura de Foro convidó’l llunes a dellos coleutivos asturianistes a una conferencia de nome ‘Cultura Asturiana y Patrimoniu Llingüísiticu’. Nella, el senador Martínez Oblanca afitó’l compromisu del partíu pa col asturianu. Xunto col representante de Foro (por designación de la Xunta Xeneral) na Cámara Alta, participaron tamién nel actu celebráu nel xixonés Centru Municipal Integráu d’El Coto, Xosé Nel Riesgo, direutor de la Fundación Municipal de Cultura, Educación y Universidá Popular de Xixón; Alfredo Ignacio Álvarez Menéndez, ex direutor xeneral de Política Llingüística; Inaciu Iglesias, presidente de la Comisión d’Economía de Foro; y Emilio Marcos Vallaure, presidente de la Comisión de Cultura y ex conseyeru de Cultura y Deporte. L’eventu foi una continuidá del celebráu hai dos años nel CMI d’El Llano y tien como oxetivu amosar los compromisos de la formación política a los coleutivos asturianistes y sentir los esmolecimientos d’éstos nun alderique posterior, nesta ocasión centrándose nel ámbitu européu por mor de la cercanía de les eleiciones. El primeru en garrar la pallabra foi Riesgo, qu’analizó la política llingüística de Xixón y anunció la convocatoria próxima d’una plaza pa la Oficina de Normalización Llingüística cola fin d’asegurar la continuidá de la mesma, yá qu’hasta la fecha’l puestu ye de llibre designación y depende de la voluntá del gobiernu de turnu. D’igual forma, destacó’l bon ambiente de trabayu dientro de Foro, onde “naide me diz lo que tengo que facer. Per primer vegada na mio vida, déxenme trabayar”. Pela so parte, Álvarez Menéndez afirmó que “Europa interésanos muncho dende’l puntu de vista de recuperación del asturianu” al significar un marcu onde la reivindicación del idioma converxe con otres llingües minoritaries. Nesti puntu, faló del Programa Europa Creativa, destináu a puxar los sectores culturales y creativos, qu’Asturies nun aprovecha. Iglesias, con ayuda de recortes de prensa del desapaecíu selmanariu ‘Les Noticies’, fixo un repás a declaraciones de políticos d’otres formaciones, como PSOE, PP y IX, “que faen promeses que nun cumplen”, y recordó la propuesta de Francisco Álvarez-Cascos nel añu 1998, cuando taba sobre la mesa la reforma del Estatutu d’Autonomía, de negociar una oficialidá diferida, dalgo que los socialistes refugaron dafechu. Nestos 15 años los avances del idioma dexáronse ver poco, pero “nun hai tantu tiempu nun había nin promeses” y, nel casu concretu de Foro, “dimos un pasu más que tovía nun rescampla, con coses distintes”. Asina, destacó que la intención de la formación asturiana ye la de sacar a la llingua de la llucha partidista y ser proactivos, llamando a la sociedá a poner de la so parte. Ente esos avances significó’l fechu de que dientro de Foro l’asturianu nun ye polémicu, “tolo contrario”, y que tolos responsables tienen bien nidio que “forma parte del nuesu patrimoniu, al igual que’l monasteriu de San Salvador de Curniana”. Pa comprobalo, señaló, namái fai falta acudir a los testos fundacionales del partíu, con “una política de mínimos impecable”. Sicasí, apuntó que “lo usamos poco en declaraciones públiques”, afalando a Isidro Martínez Oblanca, como responable de campaña de les Europees, a incorporalu nos actos y materiales, faciendo énfasis tamién na toponimia. Por último, Iglesias argumentó los motivos polos que “mirar pol asturianu ye evidentemente rentable económicamente”, cola posibilidá de recibir financiación estatal y europea pal idioma. “Lo que pasa col patrimoniu asturianu ye antidemocrático” Vallaure, na so intervención, fixo una crítica de la política cultural fecha polos gobiernos asturianos, “a esceición de los nuesos 11 meses”, y afirmó que “lo que pasa col patrimoniu asturianu ye antidemocrático”. L’ex conseyeru nun tien dulda en calificar la llingua como “patrimoniu, que ye tolo que nos dexaron los nuesos antepasaos”. En concreto, apuntó que “la llingua asturiana ye la llingua del pueblu, que foi’l que la caltuvo” pese a que la burguesía “abandonóla nel sieglu XX”, y señaló que’l “día que muerra’l falante caberu d’asturianu, cai Santullano”. Darréua puntó que lo que-y pasa a tol patrimoniu cultural asturianu ye frutu de la “inorancia” y punxo dellos exemplos de situaciones que vivió mientres el so pasu pola conseyería: “Patrimoniu paez que ye lo que namáis faen ellos, como’l Niemeyer”. Pa zarrar l’actu, enantes de dar pasu a un alderique breve, Martínez Oblanca esplicó que “como asturianu, siempre creí que tenía la obligación de conservar lo de nueso, aquello que nos identifica”, y recordó cuando nel 2001, na so otra etapa como senador, recibió a Ramón d’Andrés y a Xicu Xabel Díaz Yepes, que naguaben por echar a andar la Fundación Caveda y Nava, organización “que buscaba un consensu pal asturianu fuera de la llucha partidista”. El responsable de campaña amosó’l so compromisu pa col idioma y apuntó que’l motivu principal p’abordar la reforma próxima del Estatutu d’Autonomía “ha de ser dar la oficialidá al asturianu. Si non, piérdesenos”. “Pasa’l tiempu y vamos p’atrás”, continuó’l senador, que ratificó que “nun hai polémica col asturianu dientro de Foro, lo que demostramos con fechos nel 2011, con asturianistes en puestos de responsabilidá”. Tamién destacó’l so papel na Cámara Alta, cola presentación d’enmiendes a los Presupuestos Xeneral pa da-y una dotación económica a l’Academia de la Llingua Asturiana, y la so disposición a sentir los pidimientos de coleutivos en defensa de la nuesa cultura. Por último, apuntó que Foro quier ser “la voz d’Asturies n’España y n’Europa” y que la so presencia nes instituciones permitirá defender iniciatives beneficioses pa la cultura asturiana que “nunca serán propuesta nin defendíes pol PSOE y el PP”. Na semeya, Riesgo, Iglesias, Martínez Oblanca, Vallaure y Álvarez Menéndez. Fonte: Asturies.com

La XDLA pide a los partíos políticos que negocien un articuláu sobre la presencia del idioma na llei nueva de RTPA

Nuna nota de prensa asoleyada esti xueves 17, la XDLA aplaude que Foru Asturies presentó una enmienda que reclama que RTPA ayude a la normalización del asturianu y del gallego-asturianu y onde esixe la creación d’una industria audiovisual al traviés de la emisión de toa clas de conteníos nestes llingües" y tamién que "pela so parte, IX demanda un porcentaxe mínimu n’asturianu del 30% de los espacios, “incluyíos los informativos”, y pide facer desconexones en gallego-asturianu “nes zones onde constitúi modalidá llingüística propia”. Amás, propón la presencia d’un representante de l’Academia de la Llingua Asturiana nel Conseyu de Comunicación de RTPA. De mano, la XDLA entiende que la enmienda que meyor recueye l’espíritu del manifiestu ‘Cinco puntos por unos medios al serviciu públicu d’Asturies’, al que se sumaron una trentena d'entidaes y que se presentó na sede de l’Academia, ye la presentada por Foru Asturies, que desarrolla’l mandatu del Estatutu d’Autonomía y la Llei d’Usu del Asturianu, principios que nun tienen güecu na norma actual: "Les enmiendes d’IX, anque ameyoren lo qu'hai, nun son un avance sustancial: siguen supeditando l’asturianu a los campos de la educación y la cultura y falen de "promocionar el bable/asturianu", non d’emitir n’asturianu. Tampoco tien sentíu referise al gallego-asturianu cola denominación de "modalidá llingüística" y pidir que s’emita la programación namás nes zones nes que se fala y non en tol territoriu asturianu". Otra manera, la inclusión de l’Academia de la Llingua Asturiana (ALLA) como miembro del Conseyu de Comunicación pareznos fundamental, polo que piden a tolos partíos "qu’apoyen esta propuesta d’IX. Too esto nun quita pa solicitar la creación d’un Conseyu Llingüísticu Asesor —con presencia de l’ALLA, Universidá, Direición Xeneral de Política Llingüística y profesionales— encargáu de velar poles emisiones, modelu de llingua, proponer modelos de programación, etc." P’acabar, la XDLA quier felicitar a estes dos formaciones "por defender una presencia mayor del nuestru idioma en RTPA, dalgo que choca cola actitú de los otros tres partíos con representación parllamentaria. Nesi sentíu, nun ta de más recordar que los grupos que nun fixeron observaciones sobre la presencia del idioma na RTPA entá van tener otra oportunidá de facelo, en pasando'l Plenu de Totalidá, una y bones el PP anunció que nun va refugar el debate sobre la Llei. Ye de reseñar que RTPA ye un mediu públicu que, d’alcuerdu cola llexislación vixente, tien qu’usar y fomentar l’usu del idioma, amás d’atender al interés xeneral de la sociedá asturiana. Naide pue negar que la llingua y la cultura propia tienen interés dientro de la nuestra sociedá, dalgo que saben en TPA al ver les audiencies de los sos programes n’asturianu. Por exemplu, los dos programes non informativos de más audiencia del mes de marzu, según la empresa Kantar Media, foron dos n'asturianu. Por eso, la dexadez de funciones d'estos otros tres partíos pareznos un despreciu a la llexislación autonómica, a los medios de comunicación públicos, al deséu de la sociedá asturiana y la nuestra identidá como pueblu. Quier dicise: un despreciu a Asturies." Fonte. Asturnews

N'Ast critica la perda 145.000 € al nun ser l’asturianu llingua oficial

Nun comunicáu fechu públicu esti día, l'asociación N’AST llamenta "la ocasión perdía de consiguir financiamientu estatal pa l’Academia de la Llingua Asturiana (ALLA)". Nos caberos díes el Congresu los Diputaos acoyó la votación de delles enmiendes presentaes polos estremaos grupos parllamentarios a los Presupuestos Xenerales del Estáu pal añu 2014 y una d’elles, presentada por Enrique Álvarez Sostres, diputáu de Foro Asturias, pidía apurrir 145.000 € a la institución asturiana, que nun tien fondos públicos estatales al nun ser l’asturianu llingua oficial. La enmienda foi refugada colos votos de PP, UPyD y ERC, polo que l’ALLA va siguir ensin recibir nin un céntimu d’un presupuestu al que contribuyimos tolos asturianos. En N’AST llama-yos especialmente l’atención "el votu a la escontra d’Esquerra Republicana de Catalunya, formación que supuestamente ye sensible al fechu diferencial asturianu (nel pasáu incluso foi socia de la organización política Andecha Astur na coalición Europa de los Pueblos), pero ye bona preba de que, a la hora la verdá, caún mira namás que polo suyo". Yá nun-yos sorpriende tanto la postura de los diputaos asturianos, "especialmente de Gaspar Llamazares, que s’abstuvo na votación, ello ye, nun votó a favor de la midida. Izquierda Xunida, igual que pasare apocayá col casu de les multes de Mieres, tornó a quitar la mázcara cola que s’antroxa de defensora de la llingua asturiana pa dexar bien nidio qu’una cosa ye lo que dicen defeder y otra lo que realmente defenden". En resume, pa N’AST nun sólo l’ALLA vieno acabante de perder 145.000 €, "ye Asturies la que los pierde, y esti fechu vuelve a poner bien a les clares la situación d’anormalidá democrática que tamos viviendo n’Asturies, derivada de la falta d’oficialidá de la llingua asturiana, y la necesidá de la mesma –la oficialidá– qu’ampare los drechos llingüísticos del pueblu asturianu y que, en casos como esti, favoreza la llegada de perres de los Presupuestos Xenerales del Estáu a Asturies, que nunca nun tan de más". Fonte: Asturnews

Tamién IX demanda presupuestu pa l'ALLA nuna enmienda nos PXE

Foro y IX demanden una partida pa l'ALLA nes sos enmiendes a los Presupuestos Xenerales del Estáu

   143.000 y 75.000 euros. Éstes son les cantidaes que demanden Foro y IX, de manera respeutiva, pa l’ALLA nes sos enmiendes a los Presupuestos Xenerales del Estáu. Iniciativa pol Asturianu felicita a les dos formaciones por dar esti pasu.

   Ésti ye’l primer añu nel que Foro presenta enmiendes a los Presupuestos Xenerales ellaboraos pol Gobiernu de Mariano Rajoy –n’años anteriores, astúvose na votación– y nella inclúi un pidimientu de 143.000 euros pa l’Academia de la Llingua Asturiana (ALLA) pa “abrir una llinia de financiación” pa la institución al entender que “la Constitución garantiza la proteición de toles llingües y modalidaes llingüístiques, dedicándose esta institución al estudiu y normalización d’ún d’elles”. En total, la formación liderada por Francisco Álvarez-Cascos rexistró 33 enmiendes “que sumen 652 millones d’euros colos que pretendemos correxir el brutal recorte de Rajoy nos PXE del 2014”, esplicaron el diputáu Enrique Álvarez Sostres y el senador Isidro Martínez Oblanca.

   Pela so parte, Izquierda Xunida (IX) rexistró más de 40 enmiendes nes que reclama dalgo más de 300 millones más p’Asturies nos Presupuestos. Una d’elles, al igual que fixo l’añu pasáu nel Senáu, reclama pa l’ALLA una partida, en total de 75.000 euros, baxo una demanda d’igualdá pa col restu de les llingües que tienen carauter cooficial nos sos territorios. L’otru partíu con representación por Asturies, el PSOE, nun da importancia a esti asuntu y dexa pasar la oportunidá de pidir financiación estatal pa la única academia que nun la recibe: l’Insitut d’Estudis Catalans y la Real Academia Galega lleven 273.000 euros, y la Euskaltzandia, 143.000.

   Les cifes de los Presupuestos Xenerales del Estáu pal 2014 dexen malparada a Asturies al disponer d un total de 291 millones, un 31,6 por cientu menos que nel 2013. D’esta forma, el país ye’l territoriu onde más baxa la inversión, siguíu de Murcia, con un 27 por cientu, siendo la mengua media estatal del 7 por cientu. Estes perres van destinase, de manera principal, pa la variante de Payares (189,79 millones), un dineru que se considera insuficiente pa ver avances reales nesta obra, y pa l’autovía del Cantábricu (75,1 millones pal Unquera-Pendueles y 24 pal Otur-Viḷḷapedre).

Felicitación d’Iniciativa pol Asturianu

   El coleutivu Iniciativa pol Asturianu caltuvo reuniones en febreru colos representantes asturianos nel Congresucol oxetivu de llevar el tema llingüísticu a la Cámara Baxa. Una de les cuestiones nes que más incidió Inaciu Galán, presidente de l’asociación, foi la posibilidá de buscar víes de financiación pa l’ALLA al traviés de los Presupuestos Xenerales del Estáu, demanda que namái sofiten d’una manera real Foro y IX. De salir alantre les enmiendes permitiría que l'ALLA cuntara “per primer vegada na historia con un presupuestu del Gobiernu central pa la so financiación”. Pa Iniciativa pol Asturianu, “como se-yos espresó a les fuercies polítiques a lo llargo de les conversaciones, la cantidá agora ye lo de menos, lo importante ye introducir esta partida, que puede dir asemeyándose a les de les otres academies del Estáu nos siguientes años".

   La organización quier felicitar a les dos formaciones polítiques “por llevar al Congresu esta reinvidicación, que ye de xusticia”, porque “nun dar nengún presupuestu pa l'academia asturiana, entidá oficial del Gobiernu d'Asturies, anque de funcionamientu autónomu, cuando'l restu de les entidaes sí tienen presupuestu, ye una clara marxinación del asturianu que va contra los principios afitaos pola Constitución y la Carta Europea de les Llingües Minoritaries o Rexonales”. No que respeuta a la postura del PP y del PSOE, Iniciativa pol Asturianu señala que va trabayar “pa que dambes fuercies apoyen nes votaciones estes dos enmiendes”. Nel casu del partíu del Gobiernu, esto ye fundamental, al contar con mayoría absoluta.           Fonte: Asturies.com   

Foru critica al PSOE pola so "falta de compromisu" cola llingua asturiana

La diputada de Foro en la Junta General del Principado de Asturias (JGPA) María del Mar García Poo ha lamentado este sábado la "falta de compromiso" del PSOE con la 'llingua' asturiana. Según García Poo los socialistas se están "desentendiendo" de la presencia del asturiano en la escuela.

Según explica a través de una nota de prensa escrita íntegramente en asturiano, la Administración asturiana niega de continuo a aplicar la vigente ley de uso del asturiano y se muestra "inmovilista" a la hora de facilitar su presencia pública.

La diputada de Foro considera que la defensa del asturiano y del patrimonio lingüístico no es sólo un asunto de los ciudadanos, porque los gobiernos tienen también su responsabilidad.

Fonte: Europa Press

Foru denuncia la negativa de la Conseyería de Cultura a patrocinar la Fiesta de la Oficialidá en Bimenes

Ainara García: “La negativa de la Conseyería a patrocinar la Fiesta de la Oficialidá de la Llingua Asturiana pon en peligru la so celebración” Pa Foru Asturies “ye vergoñoso ver cómo la Conseyera abellugándose na crisis y mientres caltién seis millones d'euros pa RECREA, dexa ensin financiamientu a la Fiesta de la Oficialidá". Y ye que como cada añu, el próximu 6 de xunetu, Bimenes va celebrar la Fiesta de la Oficialidá de la Llingua Asturiana, fiesta cola que, recuerden dende Foru "el conceyu conmemora la hestórica fecha del 5 de xunetu de 1997, día nel que'l Plenu municipal aprobó la oficialidá del asturianu nel conceyu yerbatu". Sicasí, “la negativa de la Conseyería a patrocinar esti actu, basándose en cuestiones económiques, pue poner en peligru la so celebración”, tal qu'alvirtió la vocera de Foru en Bimenes, Ainara García. García apuntó que “resulta paradóxicu que nieguen esi sofitu a una fiesta que tien por finalidá poner en valir nuesa llingua como parte irrenunciable del nuesu patrimoniu cultural, cuando apocayá menos d'un mes el Viceconseyeru de Cultura y Deporte del Principáu, Alejandro Calvo, y la Direutora Xeneral de Política Llingüística, Ana María Fueyo, presentaron pa la celebración de la 34 Selmana de les Lletres Asturianes un programa d'actividaes llaráu d'actos institucionales, que como queda patente, nun son más qu'eso, meros actos institucionales que nada tienen que ver con un compromisu real cola llingua y la cultura asturiana”. “Resulta vergoñoso ver como la Conseyería de Cultura encabezada pola Conseyera Ana González, s'abelluga na crisis pa nun sofitar la celebración de la Fiesta de la Oficialidá de la Llingua en Bimenes, mientres destina más de 6.000.000 d'euros del presupuestu de cultura a satisfaer les necesidaes de RECREA, sociedá xestora ente otros equipamientos del Centru Cultural Oscar Niemeyer, símbolu ya iconu del esbardie de dineru públicu”, llamentó la vocera de Foru. “Ana González dexa asina claro una vegada más, cuál ye'l so conceptu de cultura, poniendo de manifiestu'l so despreciu absolutu y el del so partíu pola cultura polo xeneral, y l'asturiana en particular- añadió. Afortunadamente, Bimenes cunta con un bon númberu d'asociaciones y colectivos bien concenciaos cola importancia y valor de los nuesos raigaños y tradiciones, que nun van dexar que l'ausencia de financiamientu públicu, avafe la celebración d'una romería pionera que reivindica nuesa llingua como factor sustancial de la nuesa identidá como país y pilastra del nuesu patrimoniu cultural”. Fonte: Asturnews

Foru piensa que'l Gobiernu asturianu ta "cebándose" col profesoráu y pide que se convoquen oposiciones na enseñanza

   El diputáu de Foru na Xunta Xeneral del Principáu, Manuel Peña, afirmó esti vienres que'l Gobiernu asturianu tien que rectificar el so "gadañazu educativu" y convocar oposiciones de profesores na enseñanza pública. Peña caltién que'l Gobiernu asturianu ta cebándose" colos docentes d'una "manera irresponsable".

   Nuna nota prensa, Foru informa que Peña rexistró na Xunta Xeneral una pregunta a la Conseyera d'Educación, Cultura y Deporte, Ana González, pa qu'esplique ante'l Plenu de la Cámara les causes poles que nun se convocaron les citaes oposiciones. Peña critica los 10 millones d'euros que'l Gobiernu rexonal dexó de destinar pa la contratación de personal interín.

   Asina, Peña consideró que too ello repercute "negativamente" na calidá de la enseñanza, y criticó que la tasa d'interinidá n'Asturies tea ente les más altes del Estáu. "Ta bien claro y nun hai que pensar muncho pa dase cuenta que la estabilidá y sostenibilidá de profesoráu resiéntese y repercute desfavorablemente na calidá de la enseñanza que reciben los alumnos", apuntó.

   D'esta manera, el diputáu de Foru señaló qu'esixe a los socialistes que"rectifiquen y sigan l'exemplu del restu de comunidaes, que seyan coherentes y seyan solidarios colos sos compañeros". Asina, Peña calcó en que la responsabilidá sería "única y puramente" de González y del presidente del Principáu, Javier Fernández. "Tán deteriorando progresivamente la calidá de la enseñanza pública y ello ante'l más sorprendente silenciu de los sos socios d'IU", acabó.

Fonte: Europa Press.

Iniciativa pol Asturianu ofrezse a dar clases de llingua asturiana na Xunta Xeneral

Iniciativa pol Asturianu ofrezse a dar clase de Llingua Asturiana a parllamentarios na Xunta Xeneral

Pablo R. Guardado

El coleutivu Iniciativa pol Asturianu entamó’l llunes una serie de conceyos colos grupos parllamentarios con una entrevista con Foro de Ciudadanos. Nella propunxo la posibilidá de dar un cursu d’asturianu a diputaos na Xunta Xeneral.

Carmen Sela Fernández foi la representante de Foro na reunión y mostróse, según pallabres d’Inaciu Galán, presidente d’Iniciativa pol Asturianu, “mui receptiva a los nuesos plantegamientos”. Asina, la diputada acoyó con satisfaición la posibilidá de que diputaos eleutos y demás personal de los grupos parllamentarios pudieran tener la posibilidá d’afondar nos sos conocimientos d’asturianu nel so mesmu llugar de trabayu.

“Foi un conceyu positivu”, señaló Galán que, sicasí, quier esperar a ver si les bona actitú de Sela na entrevista tien reflexu na política oficial del partíu. De momento, la diputada comprometióse a llevar toles propuestes d’Iniciativa pol Asturianu a la Comisión de Cultura de Foro de Ciudadanos que preside l’ex conseyeru Emilio Marcos Vallaure. Ente los munchos temes que se tocaron, destacaron les recomendaciones del Conseyu d’Europa recoyíes nel tercer informe sobre’l cumplimientu de la Carta Europea de Llingües Minoritaries y la necesidá de la oficialidá, asina como’l desendolque completu de la Llei de Promoción y Usu del Asturianu, aspeutu ésti últimu que recoyó la formación lliderada pol Francisco Álvarez-Cascos nel so programa eleutoral.

Ún de los puntos nos que más incidió Iniciativa pol Asturianu foi na necesidá de que la oposición faiga un control na política llingüística del Gobiernu, puntu nel que Sela nun descartó la posibilidá de solicitar la comparecencia de la conseyera Ana González pa qu’esponga cuáles son los planes del Executivu nesi tema. Nesi sen, tamién reclamó a Foro un mayor usu del asturianu, tanto na documentación oficial como de manera oral, treslladando la so sorpresa de ver a persones asturfalantes del partíu utilizando’l castellanu nes sos intervenciones públiques. Los problemes presupuestarios de l’Academia de la Llingua Asturiana (ALLA) y los incumplimientos de los decretos de toponimia foron otros de los temes trataos nel conceyu.

Más contautos

La reunión con Sela ye la primera d’una serie que’l coleutivu que trabaya pola normalización del idioma quier mantener colos grupos parllamentarios, asina como congresistes y senadores asturianos. Asina, mañana a les 11.15 hores na sede d’Izquierda Xunida n’Uviéu, va entrevistase con Jesús Iglesias, senador pola Xunta Xeneral en Madrid. “El Gobiernu d’España tamién tien responsabilidá política sobre l’asturianu”, esplica Galán, que tien la intención d’estudiar colos representantes eleutos asturianos les posibilidaes de trabayar pola llingua dende Madrid.

Tres esti conceyu, Iniciativa pol Asturianu espera concretar en feches próximes otru col grupu parllamentariu d’IX y con Gaspar Llamazares, asina como colos representantes de Foro en Madrid, el diputáu Enrique Álvarez Sostres y el senador Isidro Martínez Oblanca. Mentes, pese al pidimientu, nun tuvieron respuesta tovía del PSOE, PP y UPyD.

Fonte: Asturies.com

Iniciativa pol Asturianu va aconceyar con diputaos y senadores pa falar sobre política llingüística

Iniciativa pol Asturianu va aconceyar con diputaos y senadores pa falar sobre política llingüística

Iniciativa pol Asturianu entama esta selmana una rolda de conceyos con representantes de partíos políticos cola fin de tratar la situación actual de la llingua asturiana nel ámbitu autonómicu y estatal, asina como presentar propuestes d’actuación nesta cuestión en tolos ámbitos de xestión. Pa ello, representantes de la organización van aconceyar con tolos partíos representaos na Xunta Xeneral y nes cámares estatales (Senáu y Congresu los Diputaos) qu’asina lo quieran. Dende la organización anuncien que tán confirmaos los conceyos col grupu de Foru Asturies, esti llunes 29 d’ochobre, a les 13 hores, en sede parllamanetaria, n’Uviéu, cola diputada Carmen Sela; y otru col Senador, Jesús Iglesias, d’Izquierda Xunida d’Asturies, pal miércoles 31.

Nel ámbitu de la representación d’Asturies nes cámares estatales, Congresu y Senáu, onde tienen representación FSA-PSOE, Foru y PP, ta confirmáu namás el conceyu con Jesús Iglesias, Senador por Asturies, pa esti miércoles. Iniciativa pol Asturianu "quier aconceyar con tolos grupos políticos que representen a Asturies en Madrid", pues entienden que "dende Congresu y Senáu pueden favorecese polítiques que sofiten a un meyor futuru pa la llingua asturiana".

Espliquen tamién dende Iniciativa pol Asturianu como "pel momentu", PP, FSA-PSOE y UPyD, les otres fuercies representaes na Xunta Xeneral, "entá nun respondieron a la nuesa solicitú de conceyu", anque dende Iniciativa pol Asturianu confíen en que "querrán sentir la voz y les propuestes de los ciudadanos no que cinca a la llingua asturiana y les polítiques pal so caltenimientu".

Más información:  Páxina web d'Iniciativa pol Asturianu.

Fonte:  Asturnews.

Iniciativa pol Asturianu aconceya con representantes de FAC ya IX

Dellos representantes d'Iniciativa pol Asturianu participaron nun conceyu colos responsables de Política Llingüística de la formación política Foru esti martes pasáu, 13 de marzu. Esti conceyu encuádrase dientro de la petición fecha pol coleutivu a les 22 formaciones polítiques que se presenten a les eleiciones autonómiques n'Asturies el proximu 25 de marzu. Pel momentu, namás Foru ya Izquierda Xunida respondieron a la petición de conceyu llanzada pol coleutivu de reivindicación llingüística a les formaciones que van acudir a les furnies esti domingu viniente.

Nel conceyu, posterior a otru coleutivu cellebráu esti llunes en Xixón, nel que tamién participó Iniciativa pol Asturianu, recordóse a los representantes de Foru la necesidá de que les fuercies polítiques usen l’asturianu nos sos anuncios eleutorales en valles, televisión, radio, redes sociales, amás de nes intervenciones públiques de los sos llíderes, como meyor forma d'amosar el so compromisu col idioma.

Amás, Iniciativa pol Asturianu pidió a Foru qu’incluya midíes más ambicioses pa normalizar l’asturianu nel so programa, recordando qu’hai munches posibilidaes pa facelo ensin qu’esto suponga nengún gastu pa l’alministración. Amás, recordóse-yos que l’estatus d’oficialidá, si bien nun ye una solución definitiva pal idioma d’Asturies, ye imprescindible p’asegurar el futuru del asturianu.

Iniciativa pol Asturianu ufrió tamién nesa carta’l so asesoramientu y collaboración pa dar asesorar en cuestiones llingüístiques a la formación.

Fonte: Asturnews

IX acusa a FAC d'agresión al asturianu

Iglesias acusa a Cascos de tomar por rehenes a ong's ya instituciones como l'Academia.

El candidatu d'IX d'Asturies a la presidencia d'Asturies,Jesús Iglesias, acusó al Gobiernu d'Álvarez Cascos de tomar como rehenes a la sociedá asturiana, d'"apatayar" a los ámbitos de la sociedá vertebraos en redol a asociaciones, ongs o entidaes de distintu tipu que reciben tresferencies del Principáu al retener los creitos que tendríen de recibir, y de tar realizando “una agresión ensin predecentes” a los asturianos.

Iglesias realizó estes declaraciones en axuntándose cola Presidenta de l'Academia de la Llingua, una de les múltiples instituciones y asociaciones a les que'l Gobiernu d'Álvarez Cascos va retayar el so presupuestu. Jesús Iglesias denunció que la prórroga presupuestaria de Foru Asturies inclúi un alcuerdu de retención de creitu del 20% a toles entidaes,asociaciones y Ong's que recibíen una tresferencia a partir de la cantidá más baxa que resulte de les cifres del presupuestu 2011 o del proyeutu refugáu pa 2012. “De la cifra más baxa, van quitar un 20%, lo que nel casu del'Academia significa qu'a partir d'un retayu del 27% del 2012 hai que suma-y otru 20%”, puntualizó Iglesias.

Iglesias sorrayó que Foru ta intentando convertir a les asociaciones, ong's y entidaes en prisioneros de la guerra de Foru col restu de fuerces polítiques p'amontar la presión por que se cometa “una illegalidá”, que la diputación permanente apruebe una llei d'endeldamientu. “Ye daqué refugable dende la perspectiva llegal y a cencielles despreciable dende la iniciativa política”, afirmó'l candidatu d'IX.

Pal candidatu de la coalición, la única iniciativa posible nesti momentu ye "que los ciudadanos tomen nota'l 25 de marzu" y voten un gobiernu respetuosu cola sociedá asturiana y que ponga los intereses de la sociedá asturiana per delantre de cualquier considerancia tactista, elleutoralista y pautista. “A partir d'ende, va ser posible retomar tou, dende llevantar la retención de creitu, establecer n'otros términos la prórroga ya inclusive ,si hai dilixencia aprobar otru presupuestu pa 2012 que solucione estos problemes que ta xenerando deliberadamente esti Gobiernu”, sostuvo. De la mesma, dixo qu'Álvarez Cascos esforciase en magnificar el problema pa intentar utilizar esa situación catastrófica como elementu de presión”.

“Creemos que los que carecen la retención de creitu y viven realidaes que ponen en riesgu la so propia superviviencia nun se van dexar manipoliar y van saber quién ye responsable esclusivu d'esta situación:el Gobiernu de Foru y Francisco Álvarez Cascos”, alvirtio'l candidatud'IX d'Asturies.

Nel casu de l'Academia de la Llingua, Iglesias afirmó que la xestión del Executivu “desmiente la pretendida vocación rexonalista y el supuestu compromisu de Foru cola cultura asturiana”, actitú que contrapunxo cola d'IX que, asegura, caltien “cola mesma intensidá”'l so compromisu col asturianu y la so esixencia de que sía llingua oficial del Principáu xuntu al castellán.

Fonte: Asturnews

Foru Asturies quier da-y prestixu al asturianu

Teresa Alonso afirma qu’asturianu y castellán “conviven en perfeuta harmonía”.

Teresa Alonso, secretaria xeneral de Foru Asturies, diputada y responsable de Política Llingüística d'esti partíu firma l’últimu comunicáu de la formación política asturiana sobre l’idioma d'Asturies. Nél, la formación lliderada por Cascos recuerda’l so sofitu “al desenrrollu de la Llei d'Usu y Promoción del Bable/Asturianu” y el so compromisu pa “recuperar la dignidá del idioma como mediu de comunicación”.

El documentu, redactáu en castellán, titúlase “L'usu del Asturianu dende'l respetu a toos”, y nél Foru diz atopase “lloñe d'otres postures demagóxiques que piden respetar la Llei d'Usu y Promoción del Bable/Asturianu, pero que nin la respeten nin promocionen y/o usen la ‘llingua’”.

La postura de Foru con respeutu al asturianu, afirmen “ye clara”. Como exemplu, recuerden que’l Conseyeru de Cultura d'Asturies, Emilio Marcos Vallaure, usó l’asturianu na so intervención énte la Xunta Xeneral d'Asturies, lo que califiquen “como una amuesa más de la normalidá social que tien que tener esti patrimoniu cultural de tolos asturianos”. Según Alonso “la so intervención contribuyó a da-y más considerancia y prestixu que pallabres vacíes”.

La diputada de Foru Asturies remóntase a la hestoria y recuerda que l’asturianu tenía prestixu “ente los sieglos VIII y X, cuando los primeros reis cristianos usaben l'asturianu como la so única llingua” y afirma que foi col asturianu “cola qu'entamaron la espansión de la Reconquista”.

Col desenrrollu de la Llei d'Usu y Promoción del Asturianu Foru Asturies, “quier acabar con unu de los problemes que tien l'asturianu como llingua sociolóxicamente minoritaria, que ye'l de tar disociada d'aquellos ámbitos de comunicación de prestixu”. Por ello la formación de Francisco Álvarez-Cascos quier “sacar del llar la llingua, como parte de recuperar l'arguyu polo nueso, porque l'asturianu nun ye menos que nenguna otra llingua”.

Foru recuerda, sicasí, que siguen “apostando pola llibertá d'elleición, y ye qu'aspirar a la normalización del asturianu implica'l respetu absolutu a quien decide usar solamente l'español”. Según la formación gobernante “N'Asturies, al contrariu que n'otres comunidaes, convivieron en perfeuta harmonía dambes llingües a lo llargo de toos estos sieglos, y Foru namás quier facer normal lo que siempres tuvo ehí”.

Fonte: Asturnews