L'Institutu Adolfo Posada entama un cursu de llinguaxe especializáu n'asturianu destináu a funcionarios

    Diecisiete funcionarios de l’alministración asturiana con bon conocimientu del idioma van participar del llunes al xueves nun cursu entamáu pol Institutu Asturianu Adolfo Posada. Ésti va tratar sobre l'usu del llinguaxe especializáu n'asturianu.

L'Institutu Adolfo Posada n'Uviéu

    El profesor titular de Filoloxía Española y Asturiana de la Universidá d'Uviéu y coordinador del Seminariu de Filoloxía Asturiana, Ramón d’Andrés, encargóse de la organización d’esti cursu, de nome ‘Usu Especializáu del Asturianu: Testos Científicos, Técnicos, Divulgativos y Informativos’, tres un pidimientu de la téunicu de formación del institutu Consuelo Vega. “Tien dos partes diferenciaes: una destinada al trabayu con testos científicos y téunicos, y otra a los divulgativos y informativos. A elles hai que sumar una tercera sobre l’usu de ferramientes llingüístiques na rede”, esplica D’Andrés, encargáu d’abrir el cursu’l llunes con una ‘Introducción a los estilos formales na llingua asturiana’, sesión a la que va siguir el martes ‘Llinguaxe científico-técnicu n'asturianu’.

    Na tercer xornada, la clase va ponela Xosé Miguel Suárez Fernández ‘Tapia’, llicenciáu en Filoloxía Española y Espertu en Filoloxía Asturiana pola Universidá d'Uviéu, amás d’en lexicografía y corrección llingüística, baxo’l nome ‘Llinguaxe divulgativu y informativu n'asturianu’, pa zarrar el xueves con ‘Ferramientes y recursos llingüísticos pal asturianu’, a cargu d’Héctor García Xil, llicenciáu en Filoloxía Española pola Universidá de Lleón y Especialista en Filoloxía Asturiana pola Universidá d'Uviéu, amás d’espertu en llingüística asturiana. “Esti cursu ye importante pa que los funcionarios tengan una formación nel usu del asturianu pa la ellaboración de testos especilizaos, como pue ser la redaición de les bases d’una convocatoria”, señala d’Andrés, qu’apunta que los alumnos van trabayar sobre manera de forma práutica con testos y escritos.

    El coordinador del cursu tamién s’amuesa satisfechu cola respuesta na matriculación, al tar inscritos un total de diecisiete funcionarios de too tipu nel mesmu, pal que se pidía un bon conocimientu del asturianu. Les clases va desendolcase peles mañanes na sede del Institutu Asturianu d’Alministración Pública Adolfo Posada n’horariu de 9 a 14 hores.  Fonte: Asturies.com