Los escolinos de Carreño y Gozón avérense a la Pita Pinta asturiana

   Una iniciativa de l’Asociación pa la Recuperación de la Pita Pinta Asturiana, maestros y el SNL d’El Cabu Peñes permite a los escolinos averase a esta especie autóctona. El vienres celébrase la entrega de premios del concursu de cuentos.

Na semeya, Martínez Martínez  esplica a los neños y neñes del Colexu  Públicu San Félix de Candás les carauterístiques  de la pita pinta asturiana

     Baxo’l nome de ‘Pon una incubadora na to escuela’, los neños y neñes de los colexos San Félix y Poeta Antón (Candás) y de la Escuela Rural de Llorgozana pudieron disfrutar del procesu de formación de los pitinos asina como de la raza pita pinta, una esperiencia que tres el periodu vacacional de Selmana Santa tamién van vivir nel centru escolar La Vallina (Lluanco) y nel de Quimarán. “La idea surdió del ésitu que tenía ente los críos la incubadora que ponemos na esposición que facemos de pita pinta tolos años en payares en Candás”, esplica Emilio Martínez Martínez, presidente de l’Asociación pa la Recuperación de la Pita Pinta Asturiana (ARPPA). Asina, en collaboración col Serviciu de Normalización Llingüística de la Mancomunidá del Cabu Peñes y los maestros y maestres d’asturianu, entamaron una serie d’actividaes destinaes a averar a los escolinos esta especie asturiana en peligru de desaniciu, con protagonismu espacial pa una incubadora y un ovoscopiu.

   Asina, amás de conocer meyor qué ye la pita pinta y cuidar de los güevos, “pudieron comprobar al traviés del ovoscopiu la evolución del pitu dientro del güevu”, actividá que se completó cola ellaboración de dibuxos y testos. La esperiencia resultó un ésitu grande y Martínez Martínez yá tien pidimientos pa llevar les dos incubadores y dos ovoscopios colos que trabaya agora colos neños a escueles de toda Asturies y, inclusive, de fuera de les nueses llendes. “Solicitáronmelo hasta d’un colexu de Burgos”, apunta’l presidente de los criadores.

   Como complementu a esta actividá, los neños y neñes pudieron participar nel concursu de cuentos ‘La pita pinta cacarexa n’asturianu’. La entrega de premios a los meyores rellatos venceyaos a la especie autóctona va celebrase mañana al meudía nel Centru Polivalente La Baragaña (Candás), actu nel que va tomar parte la direutora xeneral de Política Llingüística, Ana Fueyo, xunto con un representante de l’Academia de la Llingua Asturiana y de los conceyos.

De 3.000 a 4.000 exemplares reproductivos     Pese a ser una especie en peligru de desaniciu, la pita pinta asturiana ta amosando un bon procesu de recuperación. Anguaño hai de 3.000 a 4.000 exemplares reproductivos, con 80 criadores dientro de l’asociación –dalgunos de fuera del país–, a los qu’hai que sumar los que nun formen parte de l’ARPPA. De les cuatro variedaes qu’hai, la pinta negra “yá ta estabilizada, polo que tamos centrando los esfuercios nes otres trés”, esto ye, la negra, la blanca y la pinta roxa. Martínez Martínez destaca tamién l’enfotu del coleutivu que preside en recuperar el xen del pescuezu peláu “en toles variedaes”.

   “La pinta pinta ye una especie mui guapa, llamativa, con una bona producción de güevos y carne y, sobre manera, asturiana”, apunta esti criador d’Ambás a la hora de falar d’una de les seis races autóctones en peligru de desaniciu. Les otres son la oveya xalda, l’asturcón, el gochu asturcelta, la cabra bermeya y les vaques roxes y casines.  Fonte: Asturies.com