Cristina del Valle reclama la oficialidá nel programa d’Iniciativa

La popular cantante asturiana Cristina del Valle vieno acabante de sofitar dafechu la oficialidá de la llingua asturiana y darréu d'ella de la cultura de nueso nuna entrevista qu'ufrirá'l programa de radio per internet de l'Asociación Iniciativa pol Asturianu. La cantante y activista asturiana conocida ent ol mundu pol grupu musical "Amistades Peligrosas" da asina una vegada más el so sofitu a la llingua asturiana nuna charra fondera que caltuvo estos díes. Una selmana más Samuel Gradín dirixe una edición nueva del programa de la organización, Iniciativa pol Asturianu nes ondes. La entrevista d'esta selmana ye a la percélebre cantante asturiana Cristina del Valle y n'ella sofita la oficialidá de la llingua asturiana y la cultura asturiana. La cantante y activista asturiana conocida ent ol mundu pol grupu musical "Amistades Peligrosas" da asina una vegada más el so sofitu a la llingua asturiana nuna charra fondera que caltuvo estos díes. Nel programa Cristina del Valle cunta, usando l'asturianu, la so hestoria personal y les razones que la llevaron a colar d'Asturies por mor de la violencia de xéneru y el so apueste personal por esta causa y munches otres a lo llargo la so vida. La cantante y activista fai asinamesmu un respás de la so trayeutoria musical y amuesa'l so ciñu pol país, ufriendo una güeyada perguapa d'Asturies. En rematando la entrevista, Cristina del Valle diz nun entender "el porqué de la situación llegal del asturianu en comparanza coles otres llingües del estáu" y ufre'l so sofitu "a toles persones que tan trabayando pola so diginificación y recuperación". El programa inclúi tamién l'editorial mensual d'Iniciativa pol Asturianu, emitiéndose como órganu de difusión de la organización, n’Onda Peñes, Onda Corvera, Radio Narcea, Radio QK, Radio Parpayuela, Radio Sele, Radio Ujo, AllerFM, Radio L.lena, Radio Kras, Radio Noreña, Radio Nava, Radio Alma (Bruseles)... y puede sentise tamién nes canales d'Iniciativa pol Asturianu n'Ivoox y YouTube. Más información: Sentir el programa cola entrevista a Cristina del Valle: