Iniciativa pol Asturianu participó na I Nit de la Llengua al Món Digital

Organizada por Amical Wikimedia y la Direición Xeneral de Política Llingüística de Cataluña la I Nit de la Llengua al Món Digital tuvo dedicada al catalán na Wikipedia. Esti importante eventu de la llingua nel mundu dixital consiguió aconceyar a más d’una trentena de voluntarios el pasáu vienres nel Centru de Documentación de la Direición Xeneral, ente los que s’alcontraba Vítor Suárez -Vicepresidente d’Iniciativa pol Asturianu- al envís de tornar al asturianu artículos sobre la llingua catalana. Aprovechando l’alcuentru, Vítor Suárez pudo falar con miembros de dichu muérganu alministrativu y aldericar sobre la situación del nuestru idioma, ente otres persones, cola mesma Direutora Xeneral Ester Franquesa i Bonet. Esti viaxe supón la segunda vegada qu'Iniciativa ta presente en Cataluña, tres la solicitú al Institut d’Estudis Catalans, cumpliendo asina unu de los sos puntos estatutarios: da-y sonadía a la situación del asturianu fuera d'Asturies, y facer lo posible pola so reconocencia fuera de la mesma. Fonte: Infoasturies