Vixésimoquintu Conciertu pola Oficialidá, en Xixón mañana sábadu

Xixón acueye la vixésimoquinta edición del Conciertu pola Oficialidá

   Felpeyu va encargase d’abrir el Conciertu pola Oficialidá, que va tener llugar esti sábadu nel xixonés Parque Inglés. N’Arba, La Tarrancha, Dixebra, La Bandina y Dani Stylo completen el cartelu d’un eventu que cumple venticinco ediciones.

   La folixa reivindicativa qu’entama la Xunta pola Defensa de la Llingua Asturiana y Xunta Moza repite escenariu y estrena fecha. Les torgues puestes pol Centru Niemeyer y Recrea pa ceder un recintu que, en teoría, creóse p’acoyer cultura, y les escesives midíes de seguridá qu’obligaba’l Conceyu d’Uviéu pa organizar l’eventu tres la desgracia del Madrid Arena, llevó a los responsables d’estos coleutivos a repetir nel Parque Inglés, agora Parque de los Hermanos Castro, y aprovechar la situación pa retrasar la fecha de finales d’abril a primeros de xunu, una idea vieya cola que se buscaba adaptar el conciertu al calendariu llectivu y tener una meteoroloxía meyor. Nesti puntu últimu paez que nun va haber suerte, pero, como ye vezu, los conciertos van desendolcase nuna carpa pa que la lluvia nun impida la celebración d’esta folixa reivindicativa.

   Los primeros en xubir al escenariu va ser Felpeyu, a les 20 hores, pa depués dar pasu a una de les actuaciones más esperaes de la nueche, la de N’Arba (21.15 hores), formación que s’axunta otra vuelta pa demandar la oficialidá nesti conciertu. Tres el folk, va llegar, sobre les 22.30 hores, el mecigayu-ska de La Tarrancha y, darréu, el rock de Dixebra (23.45 hores), pa zarrar la xornada La Bandina (1 hores) cola so apuesta folk. Ente grupu y grupu, Dani Stylo va encargase d’animar al personal.

   Güei tovía se pueden mercar entraes anticipaes pol preciu de 8 euros nos puntos de venta siguientes: L’Esperteyu y Cervecería Mala Strana (Uviéu); Café Trisquel y Sidrería Canteli (Xixón); El Cafetón y Queen Maeve (Avilés); La Gueta (Candás); Mesón Cervantes (Tinéu); El Azul (Cangas); L’Abellugu (Mieres); La Palmera (La Pola Ḷḷena); Abre César (La Pola Siero); Pub Piero’s (Grau); La Traviesa (L’Infiestu); y el CSA La Semiente (L’Entregu). Mañana, na puerta, el so preciu va ser de 10 euros.

   Otra manera, la esposición ‘25 años de conciertu en cartelos’ zarra esta tarde les sos puertes. Ésta inclúi los cartelos de toles ediciones del Conciertu pola Oficialidá, amás d’entraes y delles semeyes, y ta abierta al públicu na uviedina Plaza’l Pescao n’horariu de 11 a 14 hores y de 18 a 21 hores.

   Rock esta nueche en Figareo.   Les persones que quieran disfrutar de punk-rock en llingua asturiana pa calentar motores de cara al Conciertu pola Oficialidá, tienen esta nueche una perbona oportunidá gracies al III Rescamplu Rock. Esti festival que se celebra nel Parque Tartiere de Figareo va acoyer les actuaciones de Sambre y Misiva, dos bandes comprometíes col idioma del país. Xunto a ellos, van actuar Nocivos, Octopus Garage y Dentellada. Los conciertos van principiar a les 21 hores y la entrada ye de baldre.

   Fonte:  Asturies.com