6/6/13

Últimes places pal cursu "Xestión cultural n'Asturies: trabayando con llingües y cultures" na UABRA

Va celebrase na UABRA, dientro del programa de los Cursos de Branu de la Universidá d'Uviéu

   Dientro del marcu de la Universidá Asturiana de Branu, que se celebra na primer quincena d'agostu en Cangas del Narcea, la Universidá d'Uviéu y l'Academia de la Llingua Asturiana organicen esti añu un cursu baxo'l títulu "Xestión cultural n'Asturies: trabayando con llingües y cultures", onde va afondase na conocencia de la teoría y les ferramientes práutiques de la xestión cultural venceyaes n’especial a los campos de la xestión de la política llingüística y la cultura n’Asturies, averándonos a la conocencia de la situación de la estaya y apurriendo ferramientes básiques pal trabayu nel campu de la xestión cultural n’Asturies. El cursu va celebrase ente los díes 5 y 9 d'agostu en réxime d'internamientu y tien un preciu, pensión completa incluyida, de 190 euros.

   Esti programa tuvo un bon nivel de matriculación pero entá queden delles places llibres pa los que pue matriculase unu a lo llargo de los próximos díes nel llar de l'Academia de la Llingua Asturiana n'Uviéu, na cai l'Águila.

   El cursu ta dirixíu por Isabel Hevia, profesora de la Universidá d'Uviéu y esperta en programes sociales d'acción cultural, y va cuntar ente'l profesoráu col periodista y especialista en xestión cultural Inaciu Galán encargáu del bloque d'Averamientu a la xestión cultural, la responsable de la Oficina de Normalización Llingüística de Xixón, Mª Xosé Rodríguez, que va centrar les sos sesiones nel campu de la xestión de la normalización de llingües y el periodista de TPA y profesor de la Universidá CJC, Cristobal Ruitiña, que dedicará la so parte del cursu a la difusión de la información nel ámbitu de la xestión cultural.

   Esti cursu tien reconocencia oficial per parte de la Conseyería d'Educación del Principáu d'Asturies, darréu de l'acreitación de l'ALLA como "Entidá Organizadora d'Actividaes de Formación Permanente del Profesoráu". Ello afita a tolos efeutos la reconocencia d'estos Programes Formativos dende'l puntu de vista alministrativu (currículum, méritos, sexenios, etc.) pal profesoráu d'Educación Primaria y Secundaria del Principáu d'Asturies. Amás, al tar nos programes de los Cursos de Branu de la Universidá d'Uviéu, el títulu inclúi créitos universitarios.

   Más información: Más información pa la matriculación nel cursu

   Fonte:  Asturnews.

5 comentarios:

  1. Amás de necesariu el curso de branu de la Universidá en Cangas tien un preciu bien razonable y aptu pa tolos bolsos.

    ResponderEliminar
  2. Bona oportunidá pa munchos y bona ocasión con la estancia de trabayu llingüísticu y tamién vacacional con collacios y collacias de la llingua asturiana en un llugar tan guapu y tranquilu como ye Cangas.

    ResponderEliminar
  3. Ye una estancia de estudiu vocacional y tamién vacacional como diz Nieves equí riba.

    ResponderEliminar
  4. Pero amás ye que los Cursos son el viveru esencial de la llingua gracies a la'ALLA y la Universidá d'Uviéu col sofitu del Conceyu de Cangas la ciudá talismán del asturianu vivu.

    ResponderEliminar
  5. Ai Manises, qué poco conoces Cangas. "La ciudá talismán del asturianu vivu", diz. Cangas ye'l furacu prietu llingüísticu del suroccidente d'Asturies, el focu castellanizador más importante d'esa parte del país.

    ResponderEliminar

Los comentarios tán pendientes de moderación. Espublizaránse lo primero dable.