El Conseyu de Comunidaes Asturianes organiza’l Día de les Lletres nel Esterior, en collaboración col Centru Asturianu de Castellón y el Centru Asturianu de Barcelona, los díes 22 y 23 de mayu, respectivamente.
Les actividaes van entamase nos dos casos a les 12:00 hores y cola mesma cadarma y participantes. Primero van ser les intervenciones institucionales y dempués va dar una conferencia l’académicu de la llingua Roberto González-Quevedo. Los actos van pesllase con un recital de Berta Piñán, recién tornada la so obra al catalán, y con una actuación de La Bandina’l Tombo.
Nel trescursu d’esos actos va presentase tamién el llibru La casa asturiana, que contién dos ensayos curtios alredor de la vivienda tradicional del país: «La casa asturiana», de Roberto González-Quevedo, y «La casa como símbolu fundacional na nueva poesía asturiana», de Berta Piñán. Inclúise tamién un testu de Manuel Fernández de la Cera (Presidente del Conseyu de Comunidaes Asturianes) y Consuelo Vega Díaz (Direutora Xeneral de Política Llingüística) y de Pablo Xuan Manzano Rodríguez (Academia de la Llingua Asturiana), amás de dellos dibuxos de Neto.
Fonte: RTPA-Estaya d'asturianu
Ye una bona noticia, un eventu de los que debieran facese dabondu en toles autonomíes con carálter fixu y que nun quedara como un fechu anecdóticu. Bon exemplu a seguir.
ResponderEliminar