El Conseyeru d’Educación y Ciencia, José Luis Iglesias Riopedre, afirmó estos díes qu’un total de 22.466 alumnos estudien esti cursu 2009-10 l’asignatura de Llingua Asturiana, de los que 21.560 reciben les clases en centros de la rede pública y 906 na rede concertada La mayor parte de los escolinos tán cursando esta materia na etapa de Primaria, en total 17.763 (son 17.053 na pública y 710 na concertada), mientres que’l restu, 4.703 ta en Secundaria (son 4.507 na pública y 196 na concertada).
Na so intervención, el Conseyeru d’Educación y Ciencia fixo balance de la evolución que tevo la escolarización d’asturianu dende l’añu 2000 fasta anguaño, al cumplise’l décimu aniversariu de l’asunción de les competencies educatives, tamién nesta materia.
Nel últimu deceniu, la matriculación de Llingua Asturiana esperimentó un xorrecimientu de 9.763 estudiantes. En concreto, aumentó en 5.000 alumnos la impartición d’esta materia en Primaria (en cifres globales pasó de 13.000 a 17.000) y aumentó en 3.700 en Secundaria (pasó de 750 a 4.500) na enseñanza pública. El porcentaxe de centros de Primaria que la imparten pasó del 70% al 91% y en Secundaria entamó nel 14% de los institutos hasta algamar el 88% anguaño. No que cinca al profesoráu, aumentó nun 63% el númberu de docentes que dan la materia.
Na enseñanza concertada nun s’impartía esta asignatura nel añu 2.000, mientres qu’agora ye d’ufierta obligada en tolos centros y ta dándose en doce colexos a 906 alumnos (710 en Primaria y 196 en Secundaria).
Fonte: Asturnews
Voluntariedá pal castellán, inglés, francés,... Que los rapazos escueyan tamién. Nun falen que ye malo la obligación, pues pa too.
ResponderEliminarBlogsaludos