La Xunta Elleutoral Central nun autoriza'l votu n'asturianu

La Xunta Elleutoral Central nun autoriza’l votu n'asturianu "por nun ser llingua oficial".
La selmana pasada Unidá Nacionalista Asturiana presentó énte la Xunta Elleutoral Central un modelu de papeleta d'esta formación billingüe pa les elleiciones europees del 7 de xunu, neto que'l que s'usa nel restu les comunidaes con llingua propia, col testu en castellanu y n'asturianu. Sicasí, refugóse dar como válida la papeleta propuesta al incluyir testu n'asturianu y "nun ser ésta una llingua oficial".

Dende UNA conseñen que "pretendíase ufiertar un modelo válidu de papeleta a tolos asturianos y asturianes que quixeren exercer el so drechu al votu utilizando la nuesa llingua y pretendíase (nel momentu de la so validación) unviala a tolos votantes qu'al traviés de la so ueb http://www.unida.as/ la solicitaren pa votar asina a UNA n'asturianu”.

Pela mañana UNA recibió la negativa a da-y como válida la papeleta propuesta al incluyir testu n'asturianu y al nun ser ésta una llingua oficial. Dende UNA afiten que'l so "serviciu xurídicu alcuéntrase iguando un recursu que va ser tramitáu esta mesma tarde pa facer por tornar una decisión que calificó de discriminatoria y que coloca a los falantes d'asturianu y a toles persones que quieran utilizar la llingua propia d'Asturies, nuna situación d'inseguranza xurídica ya indefensión." El candidatu d'UNA, Daniel Fernández, afitó tamién que "hasta que nun haiga oficialidá, la ciudadanía asturiana nun va tener los mesmos drechos que'l restu de les persones con llingua propia", y afitó que "con fechos como ésti demuéstrase que tolo que nun seya oficialidá ye un parche inútil que mos conderga a ser ciudadanos y ciudadanes de segunda".