Non al préstamu de pagu nes biblioteques

Pola llectura

Cuando yo yera mozu, na España de 1931, vivía n’Aranjuez un Mayestru Nacional nomáu D. Justo G. Escudero Lezamit. En vilu de xubilase, acudía a la escuela inclusu los sábados pela mañana anque nun tenía clases porque ellí, nun despachín que-y cedieren, atendía la so biblioteca circulante. Yera suya porque ficiérala él solu, con llibros donaos por collacios, instituciones y pás d’alumnos.Los sos 'veceros' yéremos xóvenes y adultos, homes y muyeres a quienes namái cobraba cincuenta céntimos al mes por prestar a cada cualu un llibru a la selmana. Ellí descubrí a Dickens y a Baroja, lleí a Salgari y a Karl May.

Munchos años dempués fice una visita a un bibliotequina d’un pueblu madrilanu. Nun paecía ser mui frecuentada, pero se ficiera cargu de recién una xoven titulada quien idegara un requexu esclusivu pa los neños con un trozu moqueta p’asitialos.Al entamu les más acoyeron la idega con simpatía porque servía-yos de guardería. Tres recoyer a los sos fíos nel colexu desavén-yos ellí un ratu demientres finaben la so merca, pero cuando regresaben a por ellos, nun yera raro que los neños, intrigaos pola fin, pidieran quedase un ratín más fasta finar el cuentu que taben lleendo. Na espera, les más curiosaben, coyíen dalgún llibru, güeyábenlu y a vegaes tamién elles quedaben prendaes. Tiempu dempués enteréme de que la esperiencia diera los sus frutos:delles llectores yeren muyeres qu’enxamás lleeren enantes de qu’una simple moqueta en manes d’una xoven bibliotecaria descubriéra-yos otros mundios.

Y entá más años dempués descubrí otru prodixu nun gran hospital de Valencia. La biblioteca d’atención al paciente, cola que amenorguen les llargues esperes y angusties tanto de familiares como de los propios amalecíos, foi creyada por iniciativa y voluntarismu d’una emplegada. Con un carrín del supermercáu cargáu de llibros donaos, paseándose peles distintes plantes, con llargues pelegrinaciones y lluches cola alministración tentando de convencer a burócrates y mélicos non siempres abiertos a otres consideraciones, de que la conocencia y el placer que proporciona la llectura pue contribuyir a la curación, al cabu los años llogró dotar al hospital y los sos usuarios d’una biblioteca con un serviciu de préstamos y unes actividaes que-y valieren, amás del prestixu y almiración de cuantos pasemos per ehí, un premiu del gremiu de llibreros en reconocencia a la so llabor en favor del llibru.

Evoco agora estos tres d’ente los munchos exemplos de tesónbibliotecariu, al enterame de que resurde l’amenaza del préstamu de pagu. Náguase obligar a les biblioteques a pagar 20 céntimos per cada llibru prestáu en conceutu de canon para resarcir -eso dicen- a los autores del desgaste del préstamu. Quédome confusu y nun pescancio nin un res. Na vida corriente’l que paga una suma ye porque:

a) algama daqué a cambiu.

b) ye oxetu d’una sanción.

Y yo entrúgome: ¿qué algama una biblioteca pública, una vegada pagada l’alquisición del llibru pa prestalu? ¿O ye que debe ser multada por cumplir cola so misión, que ye precisamente ésa, la de prestar llibros y fomentar la llectura? Per otru llau, ¿qué se-yos desgasta a los autores na operación?.¿Acasu dexaron de cobrar pol llibru?. ¿Se-yos lleerá menos por ser llectures prestaes?.¿Venderán menos o servirá-yos de publicidá’l préstamu como cuando una fábrica regala amueses de los sos productos?Pero, sobremanera: ¿Quier fomentase la llectura? ¿Europa prefierautores más ricos pero menos lleíos? Nun pescancio a esa Europamercantil. Personalmente prefiero que me llean y soi yo quien se siente deldor cola llabor bibliotecaria na difusión de la mio obra. Sépanlo quienes, ensin entrugame, nagüen defender los mios porgüeyos d’autor cargándose a les biblioteques. Firmé escontra esa midida n’estremaes ocasiones y xúnome otra vegada a la campaña. ¡NON AL PRÉSTAMU DE PAGU NES BIBLIOTEQUES!

José Luis Sampedro