El coleutivu Nava en Marcha organiza un ciclu de charres de nome ‘Trenes, radios, redes y patates. ¿Cuál ye’l so sitiu en Nava?’. La primera va tener llugar esti xueves y va centrase nel procesu de privatización de Feve y Renfe.
L’oxetivu d’estes conferencies ye tratar dellos asuntos d’interés de calter xeneral qu’afeuten d’una manera especial a los navetos y navetes. Asina, tolos xueves de febreru, a les 19 hores, la Casa Cultura Marta Portal va acoyer una charra abierta a tolos vecinos. La primer d’elles lleva’l nome de ‘¿Por qué llega tarde’l tren? Procesu de privatización Feve-Renfe’ y nella un representante del Sindicato Ferriovario y Paulo García, ex xefe d’estación de Nava, van falar de los efeutos de la privatización de Feve ente la población y los trabayadores de la compañía pública de tresporte.
La selmana próxima, baxo’l títulu de ‘¿Y a mi quién m’informa? Radio Nava y el papel de los medios de comunicación’, van intervenir el trabayador de TPA Óscar Vega y Diego Rodríguez, representante de Radio Nava, mentes que pal día 19 Nava en Marcha tien prevista la charrra ‘Texendo redes, apropiándonos d'Interné. Alternatives comunitaries pal accesu a la rede’, na que van participar Miguel Moro, trabayador de les TIC y escritor, y César Díez, del proyeutu Guifi.net. Por último, pa zarrar el ciclu de charres, el día 26 va falase del mundu agrariu con ‘Ente ocalitos y bardiales, ¿ónde semo les patates? ¿Ónde pacen les vaques? PAC, realidá y alternatives del campu asturianu’, cita pa la que tán convidaos Mario Morilla, d’Ecoloxistes n’Aición, y representantes de los güertos coleutivos de Para@s y Precari@s d’Uviéu.
Fonte: Asturies.com
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.